ماعاش فيه تريس

ماعاش فيه تريس
تمت أحلام ودردشة عالفيس لاحرار كملوا ماعاش فيه تريس
ماعاش فيه أحرار
عساكر كواسر جيش بومنيار
اللي مارضوش بزيف لاستعمار دون ليبيا دفعو الدم رخيص دون التراب ودون هلي صار جملة وفراد وجمع وكراديس مايوم كانو للصليب أنصار ومايوم كانو أعوان للخاسيس اللي مايهابو في أخشوش النار يمشو حفايا والتراب رميس
اللي فقدهم في غيابهم ماصار
صارت مهازل والشرف رخيص
صارت مراتع خصب للكفار
وصارت إمارة وعرش لنازيس
وبدي شعبها هايم وراء فجار
يلعب ويرتع في ملاذ إبليس
يفرج الله ونأخذو بثأر
وترقى الراية غصب عالخاسيس
ماعاش فيه تريس تمت أحلام وهدرزه عالفيس لاحرار كملوا
ماعاش فيه رجوله
تمت رخيصة طايحه مذلوله
وادنست فوق الدنس تدنيس
ورحنا هتايا في الضلال وهوله
وبدي شرفنا بين العرب رخيص
والخزي داير من علينا جوله
يفصل ويلبس في عرضنا ويقيس
بدينا عليل وهبل صاحب لوله
كذب وخيانة وجبن وتكوليس
تجيك من وخيك كسرتك مقيوله
في السوق باعك والثمن بخيس
وتمت اليوم أخبارنا مجهولة
وبدي حالنا بين الأنام تعيس
ماعاش فيه تريس تمت أوهام وخربطه عالفيس الدايم الله
ماعاش فيه أجواد
اللي قبل كانوا زهوة الميعاد
اللي دوم معدنهم ثمين نفيس
اللي صيتهم بين العرب وقاد
كي النار زايد سمعره ولسيس
لجواد في النوايب يفزعو معتاد
ماريت فيهم نذل لا خاسيس
لجواد طفلهم يقسم عليك الزاد
أصله وفصله من أصلاب تريس
ماهو كمي لانذال والجهال
اللي نسلهم ناجس رخيص بخيس
ماعاش فيه تريس تمت أشباه وهدرزه عالفيس الدايم الله ماعاد فيه تريس