أنا و جدي وطاسة الشاهي ,,

أنا و جدي وطاسة الشاهي

السلام عليكم و رحمة الله و بركاته

خير يا عويلة شنو حالكم و شنو حال هواليكم .

ان شاء الله الاخبار تمام ... الحمد لله

يا سيدي بن سيد امس و اني جاي من بعيد نشوف في جدي مقعمز تحت من الشجرة و لام شوية حطيبات عجرم و قادي نويرة تحت هاضاك الظل و حاط عليها براد شاهي ... بيني و بينكم حسدته عليه .

قلت خلي انهدرز عليه و نبيه يحكيلي علي البراد متع الشاهي اللي حاطه قدامه و شنو قصته

- خير يا حويج .

- خير خير ... خير يا وليدي .

- شنو حالك يا جدي .

- شنو الزرع هالك ... فال الله و لا فالك .... نوض تحرك من بحداي .

- " معليش جدي سمعه ثقيل " ... قتلك شنو حااااااااااااااالك .

- اه الحمد لله .

- هذا شنو اللي قدامك " بصوت عالي بيش يسمع " .

- تي تي تي داير روحك متعرفش ... هذا براد يا فرخ .

- تمش هكي يا جدي ليش الغلط .

- باهي شنو تبي بالزبط انت .... كسرتلي راسي .

- نبي تحكيلي علي البراد زمان و شنو تديروا بيه و هل هو ضروري و الا لا .

- يا سيدي بن سيد براد الشاهي هذا نعتبروه فيه البدو شي مهم في حياتنا ... و ضروري منه في كل مخلاة " المخلاة هيا ما يضعها البدوي علي كتفه اثناء خروجه للصحراء للرعي و غيره " ... و عاد انت عارف حشيشة الشاهي مصيبة ... لازم الراجل منا يشرب طويسة شاهي من وقت لاخر بيش ايعدل دماغه .

و هوني بريريد الشاهي لازم منه في كل وقت ... و لازم تكون قوية بيش تعدل الدماغ و عاد فيه نوعين من الحشيشة ... فيه حشيشة خضراء و فيه حشيشة حمراء " الحشيشة هيا نبات الشاهي " .

- باهي يا جدي انتم تزرعو فيه الشاهي و الا شنو .

- تنزرعو فيه شنو هذا يا ولدي يجينا من الهند معلب من يوم يومه في القوافل اللي اتجي متاجرة بي بضاعتها .

- باهي و شنو الفائدة منه .

- قالك الفائدة ... انتو جيل توة تشربو في القهوة و النسكافيه و تشربو في المكياطة ... و لكن حنى زمان كنا نشربو في غير في الشاهي لان فيه مادة سماها الكافيين و هيا اللي تعدل في الدماغ .

- باهي يا جدي و كيف اتطيبو فيه .

- اه قتلي كيف اتطيبو فيه ... نجيبو في حطيبات سواء من قجرود و الا عجرم " القجرود و العجرم نوع من انواع الحطب " و صبو امية في البراد و نحطو شوية شاهي في البراد علي حسب الرغبة و نخلوه يغلي علي النار لين ايطيب و بعدين انزيدو عليه السكر .

- و باهي كيف تعرفوه طاب ؟

- نعرفوه طاب يا اما بالخبرة و الا بتغيير لونه للون الغامق .

- باهي يا جدي و هل كل الليبيين يعرفو الشاهي ؟

- قالك كل الليبين و بس .... تهذا الناس كلهم مش غير الليبيين ... عرب و عجم يشربو في الشاهي .... و قالك الشاهي هذا شي متحد عليه العالم كله .

- يا ودي منور يا جديدي علي الكليمات الطيبة و خلي توة انزيد من عندي شوية بيش يولي الموضوع مية مية .

طبعا الشاهي من قديم الوقت و الناس يشربوا فيه ... و يعتبر عند البدو شي مهم و تلقي الشيابين طياح بحدا النار يراجو في طويسة الشاهي ... و في مناطق تانية يسمو في براد الشاهي السخان ... و في طرابلس و المناطق الغربية يديروله في الرغوة و هي عبارة علي رغوة بيضا تصنع من تخديم الشاهي بين البراد و اللقامة و الفايدة منها هي شد الاتربة و الغبار بحيث ميختلطش في الشاهي ... و الرغوة ايديروا فيها حتى المغاربة بس مش بنفس الطريقة الليبية .

ان شاء الله عجبكم الموضوع ..للعلم الموضوع منقوول ومعزوومين كلكم ع طويسه شاهى اه ملاحظة مهمه كل واحد يجيب الطاسه امتااعه معلش فى مطبخ زنقتنا الطواسى ناقصاات Embarassed

[/color ][/size]
أنا و جدي وطاسة الشاهي ,, 687789212

قعدت نهييج برووحى فى المنتدى ,,,هههههه

وديري الرغاوي و كشكشي يا طاسة انتي دواه اللي مريض برآآآسه
البراد يبكي المروحة ناشاته جوه الطواسي يمسحوا دميعاته
,.,انعم انعم

من طرف eldwebia الجمعة 9 ديسمبر - 5:23

بنت طرابلس نبوا جدي يحكيلنا علي 69
علي قدومه كان قدوم عمار

eldwebia كتب:بنت طرابلس نبوا جدي يحكيلنا علي 69
علي قدومه كان قدوم عمار

اكييد قدووم عمار وان شاء لله جدى توا يحكيلنااا ,,,
عزانا في فارس لبلاد
استشهد في الجبهه صنديد
عزانا في صاحب لمجاد
عزانا في الصقر الوحيد
ضد العالم خش اعناد
تحدي في حلف عرابيد
حلف باللي خالق لعباد
يموت في وطنه حر شهيد
حلف ميخشوها لوغاد
العضميى يا نقراش الايد
لكن ربك هكي راد
معمر قسمه يموت شهيد
غصبن عن خشم الحساد
هنيئا يابونا العقيد

ديري رغاوى كشكشى بالراحه ... وانت دواء للى كاترات اجراحه
الطويسة جت في وقتها ياأختنا بنت طرابلس
تسلمي عالموضوع .

من طرف ???? الجمعة 9 ديسمبر - 11:48

اه على شاي اللي ينعمل على الحطب مثل شاي جدك

ان شاءالله تتحرر ليبيا ونعمل رحلات في ربوعها ومعانا براد الشاهي ( الشاي

كيف كانت الكونتيسا تمنع الشاهى وحتى قبل 51 ايام الجهاد
وعن المطلينين مثل يوسف خريبيلينى ش الذى سلم موسيلينى سيف الاسلام عام19
او عاكف المرتزق او الشارف الخائن
ويا ريت يعرج على المعتقلات شوى وحتى معيتيق لا ينساها
وخطبة ادريس المطلين عام 19
ويهود مصراته
انا استطيع ان انعش ذاكرته بعشرات التسجيلات المرئيه