وصية الليبيين للكوريين

صـائح من ليـبـيـا إلى كُوريـا الشّماليّة ..!

- إذا صارت حرب , ننصـح كل اللّي بيشاركوا في الحرب أنّهم يطلعوا في وقت واحـد , سواء كانوا طيارين او كتايب او ( قبايـل ) , في نفـْس الدقيقة ونفس الثّـانية لو تقدروا ..!

باش بعدين ما تقعدوش تتخاصموا وتقولوا ( نامبو ) هي الشّرارة , لا ( بيونج يانج ) هي الشّرارة <_<

- إذا مات رئيسكم , وانهـار جيشكم , ننصحكم لا تديروا مجلس انتقالي ولا مكتب تنفيذي ولا مجلس حكماء ( شونج جين ) ولا مجلس محلّي ( كوانججيو ) , وخلوكم على المسميات الشرعية والمعروفة من الاوّل ..!!

- وهذا طبعاً باش تتفادوا أنهم يديرولكم ( لجنة أمنيّة عليا ) تقعدوا حاصلين فيها , ولا يديروا مرتبات للكتايب ( اللي ما حاربوش ) ولا يقعدوا يوزّعوا في المكافئات على كل من ( هبّ ) و ( دب ) على حساب الـ 25 مليون كوري وصغارهم اللي ماتوا ( على افتراض أن بيموت منهم لو صارت حرب ) ..!!

- ردُّوا بالكم بعـد الحرب تسمحوا بـ إنشاء الأحزاب , قبْــل ما اديروا دستُــــــــــــور , لـ أنّكم بعدين بتقعدوا تعانوا وبيقعدوا يتخاصموا ولا بتشوفوا دستُـور ولا حتشوفوا قانون لغاية ما تكملوا بعضكم بـ المشاكل والفتن ..!!

- الله الله في البخّاخات , ردّوا بالكم يا إخواننا في كوريا من البخاخات , لانها في البداية بيستخدموها للحُرّية , وبعد الحرب بتلقوا نص بلادكم مكتوب عليها ملك مقدّس لـ عائلة ( فومانشي ) وملك مقدّس لـ أبناء ( تاكيشي ) , وما نبّيش نحكيلكم على ( مُـوق مُـوق ) ..!!

- ديروا فتـــوة من توا تمنع الغنــايم عبر دار الافتاء الكوريّة , لـ أنّكم لو فتحتوا باب الغنايم معناها اللي ما يلحقش على حاجـة من الدولة بيولّي على رزق النــاس ..!!

- ما تختاروش مُؤتمر وطني , وما تسلّمُوش رقابكم لـ معارضي الخارج وتقولوا مناضلين , اشقوا بروحكم من البداية وديرو برلمان , وطالبوا بالعدالة الانتقاليّة قبـل كل شيء , أفضـل ما تقعدوا تستنُّـوا فيهم لغاية ما يديروا مرتبات وياخدوا سيارات وينظّموا امورهم , وبعديــــــــــــن كان ربي اعطاكم عمر يلهوا بيكم ..!!

- ما تضيّعُوش الوقت في الاحتفالات والمسيرات , واللي مقعمزين ع المكاتب " ياكلوا " في رزقكم , نظموا بلادكم قبل , حققوا اهداف حربكم , وبعدين احتفلوا حتى لـ آخر العمـر ..!!

سكّـروا القنوات على طول بعد التحرير , لـ أنّكم بتشوفوا وجوه عمركم ما شفتوها في الحرب , لكن بيهدرزوا على بطولاتهم وامجادهم وكأنّهم هما اللي حاربوا وانتم كنتُوا تدّهوروا في الصّيـن ..!!

- أنــا درت اللّي عليّــا وبلغتكم يـا أبنـاء كوريـا , وانتُــم الكُـورة في ملعبكم , والشّــاطر هو اللي يستفيــد من أخطـاءْ غيــره

في الختــام .. لما تبدا المبارة .. ياريت تلعبُـوا بعيد علينا .. لـ أنّ النّووي ( ما ليـناش فيـه ) :p

هههههههههههههههههههههه



جو جو من الأخيررررررررررررر

صحيت عليها يا الشامخ