يوميات الحاجة امباركة

يوميات الحاجة أمباركة .. بعد المغرب مشت مسعودة للحاجة امباركة لقتها ترمي في الخبزة قال لها كيف حالك يا آمباركة ردت امباركة معاش فيه حال باهي يا رفيقتى ومعاش فيه شن يفرح من الفجر لاتوا وانا من مكان لمكان العويلة تضحكوا عليهم قعدوا ينقزوا زي القرود من شجرة الى شجرة ردت مسعودة حتى هي موزة قطرية يا رفيقتى ، قالت امباركة مطر مافيش وعجاج يكتح ردت عليها مسعودة علاش بتصب المطر يا امباركة بدل المطر جؤنا المقملين ولحق عليهم الجراد وكان مايلطف ربي ردت امباركة والله يا مسعودة حتى السعي في الزريبة معاش ياكل مع بعضه الكباش ينطحوا في النعاج والجديان وشكلهم الكباش دارو مجلس اعلى للثوار الكباش والدجاج مانحكى لك عليه كل ديك شاذ فرعة دجاج ويدور بيهم وحتى هو شكله مشكل مجلس عسكري للدجاج والليل وماجاب الليل وهو يصيح كل مايشوف الاربعطاش ونصف في السماء ردت مسعودة خطرها على اتحاد الثوار الاعلي اللى دار بيان مؤيد للشرعية متع زيدان شفت الحاج الفيتوري معاهم اللي كان يعزم على الحب والحزاز ويقلع في اللوزات للصغار توا بالله هذا شنى تقولى عليه ردت امباركة ايح يا مسعودة جمعة الاسبوع اللى فات قال طلعنا زردة لمصيف تليل في صبراته ودرنا بيان اتحاد ثوار المنطقة الغربية وبعثوه للجزيرة وسكروا وخشوا للبحر يعموا مات صاحبهم اللى قرئ البيان والجمعة ذفنوه وذفنوا البيان معاه هذوم يا رفيقتى عويلة يلعبوا البلاد غاب سيدها وغابوا تريسها وقعدت مضحكة للعويلة وزيدان والمقريف جوازتهم وجنسياتهم تحتهم وكان صار ماصار ماتلقى كان كنادرهم ردت مسعودة اعطينى بالله فريدات خبزة وانقولك كانوا عابين على الهروب والله ماهو مالحقين عليه لان النار في الارض وفي السماء ولاسيارة تهربك ولا طائرة اطير بيك ليبيا يا امباركة قريب تولي نار حمراء جمر والخونة والزناذقة بنديروا فيهم مدار وحق من خلقك وسواك وبعدها توا تصب المطر وتعقل كلها في زريبها .
-----------------
المصدر المؤتمر الشعبى الفيسبوكى

مشكور على هاليوميات الصحيحة أخي عبد الحق العروبي