إلى الوطــــــــن // شعر للدكتور . محمد سعيد القشاط

{ .. .. إلى الــوطـــــن .. .. }

سرير ( ناصره ) و ( القاف ) و ( القطوسه )
وجوا دون من صبروا نهار الحوسه
_
جوك بعايد
ودونهم حمايد قافيات حمايد
سرير داخله يشبح اهموم شدايد
باش يقطعه ويكتب حياة نفوسه
واللي ظهر منَّه عليه وعايد
جمل هدو لا بركوس لا بركوسه
وياما رقد فيها تريس وكايد
عقل ركبته و يعض في كبوسه
ومن فجّ ( بن دقِّيش ) لا( بن قايد )
على الوطن قاتل قاعدات ارموسه
_
سرير اطّارح
ما يقطعه كان العنيد الجارح
ويصعب على الكوت الصميل القارح
من ( ني ) مارس ذروته مردوسه
حولين في وسع لفيافي سارح
ما شاف في ابساط السرير و نوسه
و ما يطيب للباسور كانش ذارح
ثلاثين ليله الراحله مكبوسه
يروّح قدا اللي فاقدينه فارح
ونيران يشعل قبلها مطموسه
_
سرير امروّب
يرقى عجاجه بالتراب يثوّب
يخلّي متين الراسيات يشوّب
خلا مختلي كان القليل يدوسه
قليل ماه عللي قاطعين ايجوّب
من ( غات ) لـ(غدامس) ليا ( مكنوسه )
صهيد نار شمسه للحديد اتذوّب
كيف ميجت لدماغ ( موسى كوسه )
جبال ( شلقميه ) معطشه و اتكوّب
كيف وجه ( شلقم ) فعلته المنحوسه
والدهر للي عاطلين ايصوّب
اتسجل لفخر الفاخرين اطروسه
_
سرير تراقص
ضحاضيح كاسيها سراب تباقص
ولا شعشعه نوار فيه تفاقص
حيران بنت القود فيه غطوسه
خلا خلي ما فيهش وقيص الواقص
لا (عرفجه ) لا ( شيح ) لا ( فردوسه )
يقصه عنيد الراي زايد ناقص
و قاري خواريط الوطى في ادروسه
قدا وطن هاليام فيه نواقص
عجب وين كانت خافيه مدسوسه
امكردس مدافع كورها يصاقص
اترجّع حياة العز للمحروسه

**********************

الله محيي شاعرنا البطل الدكتور القشاط.

مؤرخ وشاعر وهامة من هامات ليبيا هو القشاط رجل في زمن قل فيه الرجال بقى وفيا للعهد ولن يخون.

شكرا أخت طبيبة على نقل هذه الابيات المؤثرة .