يوميات ليبي متحشرف

منقول
ــــــــــــــ
يوميات ليبي متحشرف

امبارح مارقدتش زين نتقلب على النطع (جلد خروف) زي الشواية.. نضت الصبح جابتلي الحاجة قرناصة صفرة الفطور وماهناك فطور حارة ثمر وبرداقة (لقامة) حليب .. فطرت وتحمدت وتشكرت.. نضت لوحت للشواهي نصيب خرطان (تبن) وقاتلي العزوز خيرك يا شيباني وجهك اسود.. قتلها وانا نقدح نولع في سبسي.. هالبلاد مش عاجبتني بعد خربوها هالـ(الثوار) .. قالت قرناصة واحنا شن بنديرولهم حتى اعمورة ماقدرهم.. قتلها بنمشيلهم بنعاركهم.. قالت فكنا تو يقمعك فرخ منهم .. هذيم فروخ جاسرين.. قت هكي خذيت جردي وتوكلت للمزلس المحلي.. خشيت لاقاني أوليد لابس اسريويل مشحوط شكله متع اخته الصغيرة.. قلت في خاطري خزي عليك سرّيفة طالحة.. قتله وين امين المزلس.. قالي داخل ياعمي المتحشرف.. قتله عمي ان شاء الله.. خشيت ولقيت هذيكم الاعلامات وهذاك المكتب اللي يبقص .. وهو مقعمز زي القطوس على هذاك الكرسي الجلد.. قلت في خاطري شوره حقا الكيب صرف المليارات في هالمكاتب السماح.. ضربت عكوزي عالطاولة وقتله اسمع ياليد.. قالي تفضل ياعمي المتحشرف انستنا.. قتله انا جايك في اكليميتين مانيش جاي ضيف.. قالي تفضل .. قلتله البلاد هاوينك تشبح فيك حالة فمها زي النعجة المبشومة.. وكل يوم الوراء .. واحنا هالخبر مانطيبوا بيه.. بتصلوا عالنبي وتبطلوا فناكة وتنسوا هذا ازلام وهذا تاغية هاوينا حطينا ايدينا في ايدكم ورادعنا المايل ونوضنا المهدوم واحبال سو طاحن في بير .. وكان بتقعدوا امطنشين كرعيكم واركبين روسكم ان شاء الله تخلى وتنبت فيها نخلة. هذا اللي عندي وانتم شوفوا ارواحكم.
وطلعت من احداهم لاقاني الاوليد بوسريويل قالي ليبيا حرة ياعمي المتحشرف.. نمشي نسمطه بالعكوز على قعقوصه لين قعد يزوي زي الجرو . وقتله هاذه الحرية ياسفتول.

منقول

هههههههههههههههههههههههههه منور اخي دبلومسي