هلوسات ليبي ...

هلوسات ليبي ...
السبت 2014.09.20
كلمة حق...
جيراني في السكن .. خصومي في الوطن !! لو كانت ماتسمى فبراير ثورة كما تدعُون فإن ما يحدث اليوم هو نتيجة طبيعية لتلك الثورة ؟؟ بل على العكس تماماً فان مايحدث ليس نتيجة إنما هي خطوات ضرورية لنجاحها !!...
قولولي كيف ؟؟
ثورة بدت بمسيرة تنادي بإسقاط النظام و أول حاجة درتوها نقزتوا ع المعسكرات والمراكز ومديريات الآمن والبحث الجنائي وفيه اللي وصل بيه الله يبعده لين فجر روحه في بوابة كتيبة الفضيل . ومتلثوا بالجنود الغلابة أصحاب البشرة السمرة !! وطلعتولنا علم أكبر واحد فيكم يتفكر فيه طشاشات !! وجبتوا 42 دولة تلاقت علينا حتى الامارات وقطر والاردن اللي كانت توقف على رجل وحدة لما يخشلها التاغية !! خذت غايتها في معسكراتنا وحديدنا وصغارنا ما طلقت شي حتى مسيرة لم الشمل اللي فيها الحفاظ والشيوخ قصفتها !! وهجرتونا وحبستونا وعزلتونا وخنبتونا !! ودمرتوا مدن تحت مسمى التحرير !! وفرحانين تحررنا في ستة أيام !!ودرتوا مزلزس وجبتوا سعادة المستسار ودرتوا عزي لمذيع الجزيرة حتى في بلاده والله ماهو محصل ربعه !! وزوقتوا سيارات الشرطة باللون العنابي او الاحمر !!! والناتو كان يقصف فينا ويمشي يستعرض فوقكم وانتم فرحانين تصلوا وتدعوا ربي ينصره !! وجاكم السلاح القطري في صناديق الهلال الاحمر !! وفتحتوا مراكز تدريب للشباب باش يمشوا للجبهة ويقتلوا الجيش الليبي اللي قالتلكم عليه الجزيرة القوات اللشعب الليبي المسلح !!
ولما انتهت دسكة كتائب القذافي في الوسط والغرب والجنوب جاء يوم استكمال ما بداته فبراير وهو تكميل عقاب القوات اللشعب الليبي المسلح اللي في الشرق !!
واهي قريب تكملهم يوم عشرة ويوم خمسة والحبل ع الجرار !!
معناها زي ما يقولوا في المغرب ( بلع فمك) بالليبي يعني سكر فمك واسكت... مازال شوية زريعة للجيش في طبرق وتو يجوها !!
ودم الشهداء مايميش .......... بروحه !!
والله عندي هلبة دوة لكن بنطول عليكم قلت خليني نختصر !!
وسامحوني (نهلوس) خوكم كلام عرب

كلام عرب
هلوسات ليبي ..
الجمعة 2014.09.26
ذكريات ...
ياجماعة الخير استاحشت ايام الطاغية !!...
ايام كان يوقف فينا ثلاثة ايام في الشمس !!
وكان يسكر في الجوامع بالشهر !! وكان يضرب في اللي يلقى في حوشه مصحف !!! وما يخليش فينا نصلوا !!!
وكان يخلي فينا نشربوا في الخمر بالسيف !!
ويوزع علينا في المخدرات !!
ويرفع فينا للبارات غصباُ عنا !!!
وكان يخطف في النساوين في الشوارع !!
ويغتصب في القاصرات في حياشهن !!!
ومخلناش نسافروا برة ليبيا !!
ويقري فينا في كتب الرذيلة ويشرحلنا في كيفية ارتكاب المعاصي !!
وفطرنا في سبع رمضانات على بعضهن !!
وخلانا نديروا شواطي للعراة على بحرنا !!
وكانت إذاعاته تنشر في المسلسلات البذيئة فيديوات الكليب المسخة !!
وكانت اغانيه قمة الاسفاف الفني !! زي النجع ورحلة نغم والواحة !!
وكان يقتل في الشباب اللي طالع 24 ساعة في 42 سنة ينادي بإسقاط النظام !! هما يطلعوا في الميادين وهو يقتل فيهم حتى بالعلامة كنا مليون ونص اول الــ69 وتوة نقصنا ولينا ستة مليون بس !! من القتل !!
وكيف خلانا بعد الــ69 نتحشموا لما نسافروا ويسالنا حد انتم من وين !!
نقولوله من ليبيا بصوت منخفض وراسنا لوطا ويخي مرات نوشوشوله في وذنه من الحشم !!
وكانت ليبيا مهمشة على الصعيد الدولي حتى بالأمارة أمس تكلم عليها 30 رئيس دولة او حكومة في الامم المتحدة يشكروا فيها !!
وخلانا بلا ضي بالعشر ساعات في اليوم وما يقدرش الورفلي يخش مصراتة والعكس وما يقدرش زاوي يقص من ورشفانة والعكس وكان التبو يحاربوا في الطوارق والامازيغ يحاربوا في العرب !! وهو يتفرج
علينا وكنا عايشين في فوضى !! لا أمن لا كرامة لا معيشة باهية !!
لكن توة اهو جانا اللي حررنا لين صبينا الدم !!
وزي ماتقول طيبة الذكر الفونشة... يا سعدودي درت كناين !!
وسامحوني (نهلوس )خوكم كلام عرب

هلوسات ليبي ...
السبت 2014.10.25
ليش المفتي يطلع بس ضد الليبيين ليش ما أعلنش الجهاد ضد أمريكا اللي خطفت ابو انس الليبي من قلب طرابلس وبو ختالة من قلب بنغازي ؟؟...
وليش ما أعلنش الجهاد ضد مصر والامارات بعد التأكد من انها تقصف في جماعته على حسب قوله !!
وطلع عشر طاش مرة يحرض ع القتل . من بني وليد لورشفانة للزنتان والجبل والامس طلع يقول على شباب بنغازي صحوات وعلى الصاعقة والجيش قوة باغية وانقلابية وعنده فيديو ع اليوتيوب يشكر في متطرفي درنة وقال عنهم شباب اسلامي يريد تطبيق الشريعة ويصف فيهم بأروع الصفات !! وفي 2011 ضرب كسكسي نملي في الزنتان ومسح بطاسة ناقصة ويخي أجتمع بالأسرى الموجودين في الزنتان وماخلى ماقال وهو يشكر في الزنتان وهلها وتو طلعهم ازلام ومجرمين
والجهاد حلال فيهم !! وسمى جماعة السيارات المفخخة والعمليات الانتحارية وقطع الرؤوس بالثوار وطالب أهل بنغازي بالالتفاف حولهم !!
وتو بعد المقدمة السابقة نحب نقول لجماعة فبراير .. يرحمكم الله... لما كنا نقولوا عليه انه كاذب ومفتن كنتوا تقولوا لحوم العلماء مسمومة .. وهذا مفتيكم يا عبيد التاغية !! لأنه زمان جاي على هواكم !! وتو بعد أن حصص الحق وطاح الغطاء يا مبنبكة .. طلع لحمه حلو ويتكل !! على فكرة الاعور أهواه عمره ما قال لاتباعه ومريديه انهم يردوا جماعة تاورغاء ويعلنوا الجهاد ضد ظالميهم وحتى لما قررت تاورغاء ترجع لأرضها طلع ودار عصا في العجلة !! وعمره ما دل الليبيين على صلاح وعمره ما سامح بين زوز متعاركين إن شاء الله حتى زوز مفرخ متعاركين في كورة !! صايرله زي اللي شاد مروحة كل ما اطيح النار يزوي عليها يولعها !!! والله العظيم ليبيا لن تقوم لها قائمة وفيها ناس قاعدة تسمع لفنحاص الغرياني !!
وسامحوني (نهلوس) كلام عرب