هلوسات ليبي ..

سؤال .
إذا أعترف العالم بحكم المحكمة الدس ثورية بخصوص البرامنة !!
شن بيكون وضع الجماعة اللي شيطت في الليل لطبرق ؟؟ وفيه نايبة من النوايب مشت لتونس ومن تونس لعمان ومن عمان لطبرق !! والجماعة فرحوا بيها ووزعوا عمببر وراني حبيبات لوصلتها بالسلامة !! وكيف بيصير في العرس الديمقراطي ؟؟ معناها العيب من من ؟؟ من العروس او من العريس أو من صاحب البوطي !! ومن بيخلص الفرقة والطيبات اللي عصدن البازين وقرضن الفلفل للمسير ودارن العصبان والمغربيات اللي غسلن الماعين !! والشيباني اللي على الشاهي !! والكوشة والخيم والكراسي !! وكيف بيصير في الفروخ اللي صفقوا واللي ولعوا الخط ولوح قدام سيارات الزهاز !! وكيف بيصير في السدارات اللي تشحطن على الكراسي !!!
دايرات النشأ للرداوات والمحارم لين تقول لابسات ماكاوة !! وكيف بيصير في جماعة الزكرة اللي سخنوا الدرابيك ونفخوا الشكاوي وزنبلوعها كسكسي نملي ومسير وعصبان ومسحوا بطاسة حمراء محروقة يحسابوا روحهم حق بيديروا نوبة في العرس الديمقراطي !! والله بجد بجد البرامنة اللي من المناطق اللي مسيطر عليها القساورة واللي مشوا لطبرق زعمك يقدروا يولوا ويرشحوا روحهم مرة تانية في عرس ديمقراطي تاني كان العرس اهواه ماصارش منه ؟؟ اني نقول عادي يتفظلوا من بيكلمهم !! أصلاً احني نعيشوا الديمقراطية في ابهى صورها وفي ازهى عصورها !! يولوا معززين مكردين يعلقوا صورهم بالابعاد الثلاثة على أول بالو يقابلهم !! من غير حتى ما يكتبوا مؤهلاتهم ؟؟ وايه حق شن بيصير في البلابل اللي تزوجوا في البرلمان زعمك بتقعد معاه وإلا بتروح مع سيارات الثالث !! الحق وضع محير الصراحة كاني مكانهم نطلب المحكمة الدس ثورية لحل الاشكال بين عرب العريس والعروس !! مرات يلقولها محلل !! ويا ما أكثرهم ؟؟ وخاصة في قناة النبح كلها محللين ^^ !!
وسامحوني (نهلوس) خوكم كلام عرب