تقرير من حرة من حرائر سرت: الجماعات الداعشية في سرت

اولا: كل وقت يخطموا علينا بي مكبرات صوتية ويقولوا (الصلاة ياعباد الله .. ادوا الصلاة يرحمكم الله)
ثانيا: شي اي حد يلقوه فاتح محله فوقت الصلاة يقفلوا محله أو اذا ناقشهم يقفلوا المحل ويرفعوه
ثالثا: مستشفى ابن سيناء والضمان الاجتماعي فقط موظفينهم يشتغلوا وباقي القطاعات والدوائر واقفة وبالنسبة لي موظفي بن سيناء وعندي شباب من منطقتنا الزام واجباري الدوام يقولوا
والا يجوا ل باب بيتك ويقوموا ب رمي رصاص او عمل كلاكس امام بيتك اذا ما داومت وحاجة ثانية مشغلين شاشة كبيرة فالمستشفى ويقوموا بعرض فيلم وثائقي فيه اشخاص من تنظيم داعش تقوم بذبح اشخاص وتعليم كيف يتم الذبح واللي جاي بيعاين مرته واللي شيبانيه والا امه يرعش من هالفعل هذاي يعني شي مزري
والممرضات قاموا باجبارهن وباقي طاقم المستشفى بالكامل لازم يلبسن عباءة وخمار وفعلاً كل نساء سرت التزموا (بالزي الشرعي ع قولتهم )وانا من ضمن النساء اللي شريت عباءة وخمار
_اي عائلة تمر من عليهم وفيها امراة مش لابسة خمار يقوموا بإهانتها أمام زوجها وكذلك زوجها يقوموا بإهانته.
_اصحاب المحلات كلهم مروا عليهم وقالولهم ادفعوا الجزية
_اصحاب محلات الذهب يدفع مبلغ وقدره....
واصحاب محلات الاجهزة المنزلية يقوم بدفع
وباقي المحلات تدفع مبلغ وقدره....
_بنسبة للشباب يقوموا بتفتيش اجهزة هواتفهم واذا وجدوا احد عنده صور للقايد يمسكوه ويجلدوه والى الآن ابن عمي عندهم وقام عمي بزيارته وما طلع
رابعاً : المصارف مقفلة بالكامل من حوالي اكثر من شهر تقريباً وبعض مدراء المصارف استتابوا وصادروا اختامهم وكل ما يتعلق بعهدتهم .
بالنسبة لي موضوع الاستتابة يقوموا بتهديد آبائنا وشيوخنا وتهديدهم بأبنائهم وممتلكاتهم حتى يستتببوا تحت أيديهم فالجوامع.
خامساً :بالنسبة للجنسيات اللي موجودة بالتنظيم الارهابي
( توانسة الاكثر نصيباً ، مصريين، باكستان ، سوادين ، تشاديين، نيجيريين ، سوريين ، سعوديين، ومن ليبيا مدينة درنة تحديدا متشددين جداً وبعض عملاء مدينة سرت وهم قليل ومعروفين ) وقريباً الشرفاء رح يتصرفوا معاهم
_بالنسبة لي ملابسهم سوداء زي اللي فالفيلم اللي عرضوه وهم يقوموا بذبح العمال المصريين
ومرات يلبسوا لون اخر وهو اللون الترابي ( الاشهب هكي نقولوا ف سرت) وزي الصاعقة
والفترة الاخيرة هذي اعتقالات كبيرة يلبسوا زي شبابنا ويركبوا ف سيارات عادية زي مواطني سرت حتى يسهل عليهم القاء القبض على الاحرار
سادساً: الاتصالات ( شبكة ليبيانا و المدار وخدمات الواي ماكس وخدمة ال ADSL ) مقطوعة من اكثر من شهر
ماعدا الصحن أو ما يسمى بالقمر الصناعي ( wire less access point )
واساسيات الحياة الاخرى مثل ( البنزين ، والغاز ) غير متوفرة من حوالي شهرين او اكثر الناس تسافر لي اجدابيا مصراته الجفرة لحتى تحصل ع هذه الاساسيات .
بالنسبة للمواد الغذائية يعني في نقص والدقيق غير متوفر بشكل كبير وبعض المخابز مقفلة فالفترة الاخيرة والمخابز اللي تشتغل تعطي عدد معين من طقع الخبز
بالنسبة لبعض المنازل قاموا بالكتابة عليها( ملك الدولة الإسلامية) وبعض العائلات نزحت من المدينة والمدارس الابتدائية فتحت ابوابها ولكن لاتوجد بها كتب وبعض العائلات اخذوا ملفات الدراسية الخاصة بأبنائهم وغادروا المدينة لكي يتم استكمال دراسة ابنائهم.
يعني سيطروا على سرت بالكامل ابتداءً من بن جواد شرقاً الى بوابة الخميسين غرباً بالقرب من الهيشة الجديدة القريبة من مدينة مصراته.

والله علي ما أقول شهيد .......