شن اللي صار في المنتدى؟؟؟؟؟؟؟؟

بسم الله الرحمن الرحيم...

يا خوتي معقولة الواحد يغيب عليكم شوية و يرجع، يلقى الدنيا مقلوبة فوقي لوطي؟؟؟؟؟

خيركم يا سلام الله؟ شن اللي صارلكم؟ هذا غير نفخرو بيكم و نقولو فرسان و رجال و حرائر...نرجع نلقاكم تنهشو في لحم بعض؟؟؟؟؟ والله فعلا عين و صابتنا.

و الا توا بتقولولي "أعصاب و ما أعصاب" و ما نعرف شنو من كلام المسلسلات الخايب...بتجو أصبر من سيدنا أيوب عليه السلام و الا أحلم من سيدنا ابراهيم؟

ترا فكونا من جو المسلسلات التركية و العنو الشيطان و استهدو بالله و صلو على نبينا محمد (عليه أشرف الصلاة و السلام) و ما تشمتو فينا العدو. الناس تموت في الجبهات و تعض على قلوبها و تصبر و شادة السلاح و توسع في بالها على بعضها بش يقعدو متحدين و يد وحدة ضد العدو، و انتم مدايريلي جو الصغار متاع ضربني...اضربوه و الا نطلع!!!!؟؟؟؟؟؟؟؟؟

ما توقعتها من الاحرار يديروها. انا، يجيني واحد و يسبني و الا يسب صديقي، انوض نطلع و نخليهاله؟؟ هذا غير نقولو عليكم مجاهدين بالكلمة..طلع لا جهاد لا شي. ديرو حجة "التعب النفسي" و تخيلو رواحكم أصبر من سيدنا أيوب و خلو الجرذان ترتع في المنتدى بسياسات اليهود متاع "فرق تسد"...

و الله غبنا عن المنتدى لظروف قاهرة لكن كنا مطمنين عليه باصحابه..نجي نلقى أصحابه قالبينه...ليه هذا كله؟ حد يفسرلي!!!!!

مافيه إلا الخير اختي الكريمة وكل الموجودين هنا هم من الأحرار ونفخر بهم
والموضوع بسيط جدا ولايحتاج لمثل هذه الأثارة
كلها زوبعة في فنجال

نتمنى انه الجميع يكونو مثلكم و يشوفوه فعلا سحابة صيف و زوبعة في فنجان...يالله، خذولكم هالنكتة اللي سامعتها جديدة:

مرة فيه أسد و نمر و ثعلب و فار يدهورو في الغابة...بعد مدة علق النمر:
يا جماعة جعنا
رد عليه الثعلب:
شن رايكم ناكلو أضعف واحد فينا؟
ناض الفار بكل مروءة و قال:
والله اللي يقرب الأسد ما ندير فيه الخير

ملاحظة: هذا فار و مش جرذ، يعني تطلع منه الشهامة عادي

brokenpen82 كتب:نتمنى انه الجميع يكونو مثلكم و يشوفوه فعلا سحابة صيف و زوبعة في فنجان...يالله، خذولكم هالنكتة اللي سامعتها جديدة:

مرة فيه أسد و نمر و ثعلب و فار يدهورو في الغابة...بعد مدة علق النمر:
يا جماعة جعنا
رد عليه الثعلب:
شن رايكم ناكلو أضعف واحد فينا؟
ناض الفار بكل مروءة و قال:
والله اللي يقرب الأسد ما ندير فيه الخير

ملاحظة: هذا فار و مش جرذ، يعني تطلع منه الشهامة عادي

هههههههههههههههههههههه

والله والواضح انو ماعادش فيه اخبار جديدة فاخونا فى المنتدى كسدو
فصار اللى صار(عركات وحرج وانسحاب وتضامن وتلويح كلام ..م الاخير سيناريو تركى)

لكن بالله شنى رايكم مش اقوى من المسلسلات التركية

بنت الزعيم الليبي كتب: والله والواضح انو ماعادش فيه اخبار جديدة فاخونا فى المنتدى كسدو
فصار اللى صار(عركات وحرج وانسحاب وتضامن وتلويح كلام ..م الاخير سيناريو تركى)

لكن بالله شنى رايكم مش اقوى من المسلسلات التركية

والله يا اختي فاتو المسلسلات التركية منهم غادي...غير ما يطلعلي واحد منهم في الحلقة الاخيرة مراد علمدار متنكر و مدايرلنا هالتراجيديا كلها