هذي دار عربنا لقدم!!!!!!!!

هذي دار عربنا لقدم الله دايم إتقول فيها ماصار ملم
***
_هذي دار أسياد ام شعف
اللي في العافي نزالين

_عرب غاشيهم متراصف
انظاف انياهم متفقين
_عرب وناسة للخايف
امعاهم عاش اتقول جنين

_عرب عاقلهم وين حلف
ابما قال ايوفي ليمين

_ايهندب عالجار ويعطف
عللي م الأب قزازين

_عرب نزالة للطارف
عرب لكحيلة كسابين

_عرب وين ايقابلهم صف
ايردو في الصاع ابصاعين

_عرب ماعاد الهم صايف
اولاعاد اتراعيهم عين

_اللي خش الصحرا يصدف
منازلهم وآثار عوين

_عرب عيلهم ماوالف
حشيش وروج ولا هروين

_علي كتفا دقرة ناسف
نقل بوكفة واسباقين

_ابسرعة وين جناحه رف
اتقول امشلعبها سكين

_الدم اللي سال اشرشف
وهي تقعد للصيادين

_وناتوصيفا مانعرف
الدامي حرفت بوالروين

_إلانا ع القود انقطف
امرافقها مدة وسنين

_عليها نحكي وانخرف
شرف مني لم حوارين

_اتشيل وتحلب واتكلف
اتدير علي معتازين

_اتخش ارمال اسيوف اودف
وقور أزرق دار دخاخين

_اتجيب احمول غرايرصف
جداوي هواري واقرين

_سفينة في موجة تدلف
زفيها بين السواقين

_اتفاغي ينزل فيه الخف
اتفوتا وتجيب عبارين

_قطا في سكرت قبلي نف
زقيق اعراها دار زنين

_أولها ع النجع إشارف
ابها يافرحت لقياطين

_اوتم رقيق الدق ايزف
الصفارة واللاقايين

_اللي بيته فاضي ستف
نظادي واغطاه شلافين

_اللي صاحبته فيه اتلف
كما جامع للصلايين

_مخالي واطقاق امزخرف
امقزول عند الجدالين

_وبين الجبر فيه اقحف
وسدي مليان جداوين

_وحنطة مليانات علف
وزندة بلمخ مداهين

_وصفرت عالة اتلاصف
انحاس وفيها برادين

_عليهم وين الطرقي لف
هتايا جوه الطرايين

_ايبات امقدر وامشرف
ايسهرو فيه ومبسوطين

_اركيبهم وين ايحرجف
نهار اوروده حظارين

_اتجي للمنهل تساوف
وهم بدليهم سقايين

_إلها قالو ياهدل الشف
ملايا حيظانك لثنين

_علينا كل اوقات اتهف
اكحيلة واللي مفقودين

_إبها نص الليل انخترف
ونا نايم إبها انحلم وهي في
وادي فيه رتم
علي هلها ديما نذرف ونطريهم
ابهم مهتم ابوادي بنايت بوكم

هذي دار عربنا لقدم

***