ياقلب يا مجروح

*ياقلب يامجروح ليش اتنوح ؟ من غدر خوت ليهم منزلة فالروح ..! قال قبل..~


قال قبل كانو خوتى ..... دواء لعازتى ونحسابهم تابوتى
وماحسبتهم يبدو سبب فى موتى ..... ولايبدلونى بمنزلة وطموح
ويكونو سبب فى هد حرم ابيوتى ..... سجاد حمر ولوآ للعدو مطروح
ويقولو غدير وتنقصى وتفوتى ..... ياموجعة طفحتى عالوجاع اطفوح
قبل داير قوتهم من قوتى..... وبابى على بيبانهم مفتوح
مبروم حبل فى وجه العدو ثالوثى ..... بيه نفخروا وآن الشرق فالروح
إروي بدمهم لجداد ماهو بوتى ..... ايهون غير عاالواطى وعالمفضوح

قال قبل كانو لينا ..... احزام صف فالحاضر ومن ماضينا
بهم عزنا وهم قبل كانو بينا ..... اقراب قلبنا ديمه الهم مفتوح
خوت عهد بيهم شابكين ايدينا ...... متفاهمين عالمخفى وعالمطروح
انساب وقرايب كيف ما اتسمينا ..... وماينقلوآ قدامنا ملووح
نختلفو احيان وينتهى فى حينه ..... الخلاف بينا للغير مام مشبوح
ولا بالغلب مالغير يوم ارضينا ..... التاريخ يشهد بالمجاد ايبوح
مامن عدو رد وعليه قضينا..... على جرتا ومن غايتا مقموح
ومعا بعضنا خضنا معارك شينه ..... سوا فى الموات وفى عدد لجروح
الحبل المثلث من اسنين اسنينا ..... .عندا اهداف مرسومة بكل وضوح .
لين ليبيا جاها عدو غازينا ..... عدو دين عندا كل شى مسموح
.تحت رايتا مامن عزيز بكينا ..... محسوب كل عيلة عندها صاروخ
وعزاء من فقدناهم جميع طوينا ..... ورقصنا عليهم رقصة المدبوح
طمع خوتنا فالحكم فااخر غينه ..... اتحب تفهما تحتار فيه ادووح
انقسمو وقسمو صفنا وارريينا ..... هيالهم انهم ركبوا سفينة نوح
نسيو وتناسوا كل ماعانينا .....و بدو فى عزانا ناصبين افروح
بان حقدهم فاصعب اوقات علينا ..... وبدوا لى اعدنا يهتفو باالروح
فجرة عدو كافر ايقاتل فينا ..... ولقى طرفهم لقتالنا مطروح
ما ى عاد قصة حكم بينى وبينا ..... هدا عدر ولا بينا مقبوح.
بدو تايرين واحنى اوباش ابدينا ..... اللى قبل كانوا للنضام اجنوح
..ومنهم اللى ماهوش راضى فينا ..... اضعف موقفا خايف ابدى مبطوح
ايصير فيه كيف ماصار منهم فينا ..... على شى ماعنداش فيه اصلوح
هدا كيف قبل اميركا تبينا ..... فتيل نارنا فى بعضنا مقدوح
زعم جاردة فزعة ورحمة فينا ..... لين من بعضنا دمنا مسفوح
على مصلحتها ناوية تفنينا .....ومايهمها فى وطنا المدبوح
لنقانها طامة وجريمة شينة .....بدما اولادنا بيدينها ملطوخ
الحلف الاطلسى هاجم بقو علينا .....صمد شعبنا قاتل بكل شموخ
ودمر مساكنا وهد ابنينا ......وركب فى عزايزنا وفى لفرووخ
ابدى شرع عندا من زمان ضغينة .....وعندا حق من ربى وله ممنوح
علي قولهم فزعت الله ونبينا ..... هالشعب حسب القول من لشيوخ
طيور ربنا وهم فالشدايد عينة .....مااتخش فاالناسخ وفاالمنسوخ
حسب مايجيه الوقت يبرم دينا .....بات فالدبغ ليله اصبح مسلوخ
رموا ثوبهم لول على تركينا .....ولبسوا ثوب من لون الكفر مبخوخ.
اولو مع كلينتون صورهم شينة .....مستقبلينها فى طرابلس باالروح
الصورة لها تدكار من ماضينا .....منها رآيحة بيع الأوطآن اتفوح
اللى قبل ماتقدر اتخش عرينه ..... عرين اسد بينا وبينها لسفوح
.اصحاب اللحايا والكفر ياخينا .....كيف قلبهم لى بعضم مشروح
. وكيف من عمايلهم اليوم اسهينا .....وانباع وطنا بيعا بطيب اطروح
وماتهمنا خونة اللى ماو لينا . ..... حتى انكانها توجع وماى فاالسوح
دمار صفنا خلف علايل فينا .....دايرات فى وسط القلوب اشرووح
ودمار وطنا نلقاه حاجة شينه .....الخشاره اللى مابعدها مربوح
ضلام قبل زعمك بعد توا رينا .....الضلم بعد بآنلنآ بكل وضوح
لنا رب يشبحنا ويشفع فينا ..... باب رحمتا للى دعا مفتوح
لايكتب علينا دل لايكافينا .....ويسامح على مافات خير اسموح.
هدا لوم منى لمن يلوم علينا . ..... وللى يعد لوم اللايمين اشروح.
على نجعنا نضبح ونجعى وينا .....انكان نجعنا مازال فيه اضبوح

***

ياقلب يامجروح ليش اتنوح ؟ من غدر خوت ليهم منزلة فالروح ..! قال قبل..~

*** ============================================ سرت التي تتوسط ليبيا الحبيبه وخير الامور اوسطها

ياقلب يامجروح ليش اتنوح ؟ من غدر خوت ليهم منزلة فالروح

اللهم اعن قلوبنا التي تفطرت من غدر اقرب المقربين الذين كنا نعتبرهم من السند الداعمين

آه يا قلب كم تحملت وتحملت وتحملت ولكن يبقى الأمل هناك من انه ما زال في هذا الشعب من يقوم بهذا السند بعد غدر القريب وخيانة الصديق

آه يا قلب فعزائك الشرفاء والأحرار الذين سوف يلملمون الجراح ويبنون الحاضر ويصنعون المستقبل

كلام حلو بس ياريت في الادبي وشكرا