زنوبيا

زنوبيا زنوبيا اسمعي يا زنوبيا اسمعي
أبواق الرومان عم تعلن نهاية تدمر
تدمر يا نجمة المشارق
حاصرتك روما و أستشهدوا أبطالك
لبصرى عم ينسمع نحيبك يا طفلة الممالك
أهربي يا زنوبيا أهربي أهربي
وين العربية أهربي و الممر السري أهربي
و كرام الدراويش أهربي و لا تذلك روما زنوبيا أهربي
لأ إذا أنا بهرب الأرض ما بتهرب
كل شي عم يهرب
المملكة السعيدة طفلة الممالك هربت من إيدينا
خمس سنين حكمت زنوبيا بنيت حضارة ثارت على روما
خمس سنين با غفلة سريعة يا خمس سنين
خمس سنين مائة سنة بيمروا متل الطير
بياكلهن الزمان الزمان اللي بياكل كلس الحيطان
بس اللي بيبقى اللي وحده بيبقى شرف الوقفة صرخة بوجه الظلم
انهدم البرج انكسر السور العسكر هاجم صوب الملكة مثل الأطفال اللي بدن يتخطافوا اللعبة
أهربي يا زنوبيا أهربي يا زنوبيا
و إنتو؟
نحنا منبقى نحنا عشب الأرض
و العاصفة بتمرق فوق بتكسر الورد العالي
الوردة إنتي و العاصفة جاية تاخدك إنتي
أنا زنوبيا ملكة المملكة النبيلة لأجل الحرية بختار الموت اعطوني كاس الموت
الملكة العظيمة رفضت الظلم و اختارت الموت اختارت النسيان
ودعوا زنوبيا بموسم الدمع بصوت الفرح بورق الرمان
يا موت يا زهرة البطولة يا تاج الحياة و عطية المحبة الخجولة
يا موت هديني بإيدي خذني ع طرقات مفروشة بالنوم و سعيدة
و يا أهالي تدمر خمس سنين من العمر عشتوها أحرار
إلكن سمة و هوية و اللي سكن الحرية ..يوم نهار ما بقى تقدر روما تسلب منه الحرية
كاسك يا موت
أورليانوس الأمبراطور
زنوبيا ما إلك مهرب من روما حتى بالموت
أورليانوس أنا برفض روما و سيطرة روما
إنتي تمردتي
نحنا عم نتحرر
و عارفة مصيرك؟
عارفة مصيري بساحات روما مكبلة بالحديد
تمشي بالشوارع مغلوبة أسيرة يتفرجوا الناس عالملكة الأسيرة
اللي بدو يصير ما عاد يهم أنا لعبت الدور و الدور المهم
لا تخدعي الناس صارحي الناس قوليلن انكسرتي انكسرتي انكسرتي
أورليانوس الإنكسار بيمضى و الإنتصار بيمضى
و بكرة بالإيام تدمر اللي انكسرت و روما اللي انتصرت اثنينتهن حجار
و أنت و أنا تمثالين بساحة الأثار
لكن بكل زمان و مكان بدها تطلع روما تطغي و تظلم و بدها تطلع تدمر ترفض الظلم
و بآخر الآخر بسهول الزمان تنتصر تدمر تدمر الحرية تدمر الصرخة اللي بقلب الإنسان
كبلوا زنوبيا خذوها على روما
تتقدم أجسامنا يحصدها السيف الحاصد
تتمدد أيامنا ينهبها الوقت الراصد
إذا مننسى زنوبيا أو صرخة زنوبيا
لوحوا بإيديكن ودعوا زنوبيا
قولوا للشعرا يكملوا الأشعار
قولوا للثوار يضلهن ثوار
المملكي تدمر انتهت من الأرض
صارت بالقلوب صارت بالمدار
صارت الصرخة و صارت النار
أورليانوس عجل خدني على روما عليت الصرخة كبرت على الموت
لاعسكرك أورليانوس و لا قوة روما و لا كل روما بالدهر بتسكت هالصوت