غناوي وهجاوي الرحي اللي عنده يتفضل ايضيف هنا

بسم الله الرحمن الرحيم
غناوي وهجاوي الرحي اللي عنده يتفضل ايضيف هنا
الرحى..
تتكون من دفتين سفلية وعلوية لا يوجد بينهما حاجز ويثبت في وسط الدفة
السفلى مسمار من الحديد يدخل في فتحة دائرية بقطرائيل خمسة سنتيمترات
تقريباً بالدفة العلوية التي تثبت بها قطعتين من الخشب على جانبي
المسمار تسمى (الفرش) ويسمى هذا المسمار (قلب الرحى)، وفى طرف الدفة
العلوية يثبت قضيب من الخشب بطول قبضة اليد ويسمى (الشظ) يمسك به أثناء
(الرحى) الطحن.
وأثناء طحن الغلال تردد النساء بعض الأهازيج التي من شأنها أن تخفف
عنهن عناء العمل، وعادة ما تحمل هذه الأهازيج إشارات معينة نحو موضوع
ما ، وتختلف الأهازيج من أداء فردى من قبل امرأة واحدة ، إلى أداء
جماعي تشترك فيه عدة نساء كما تختلف أنواع الأهازيج، فمنها ما يشبه
(غناوة العلم) ومنها ما هو قصيدة من عدة أبيات وتسمى أهازيج في التراث
الشعبي بــ (المهاجاة) أي المحاكاة بين المرأة والرحى . .

وهذه مجموعه من الهجاوي التي تغنت بها امهاتنا

تعذرت ماجابهم عذر وحلفت ماصدقوني
وقولولهم يطلقو النار وكان يقدرو يحرقوني

ياقلب يامذهب الكلب غير ليه ماتكافي بنادم
لانك اصغير ويوروك ولانكش في الراي عادم

إن عاب صاحب لا تعابيه راه صاحب العيب نادم
إيزل القلم فيد قاريه يابال عقل البنادم

ما يعجبنك تباريق دون ما ادوس الدخايس
راه ولد سقطة الريق أيجيبك لدار النقايص

يا فاعل الخير لاقيه ويا فاعل الشر نادم
اللي يعابيك لا تعيبه راه صاحب العيب نادم

يا حاج لو ريت هلنا زينين ماهم وعـارا
ما يضربوا غير بالسـيف ويتحزموا ع الغــدارا

هلنا وضناوين هلنا وهات قرعتك يا معاشي
هلنا اليا صار ما صار ايجو معريين الشواشي

لا عندنا دونهـم دون ولا زول يردع غلاهـم
اجعل زنادي يكـذب زول العدو كان جاهـم

غرب وخش الرقاريق وجن موج الابحار دونه
يا الله يا عالين فوق حجب على زول خونا

يا ولد العز صحيت بي الفعل كلامك عطاني
شي بيه يا خوي تميت نشعر ونكتب غناني

نا يا خوي أنوصيك الدم الردي ما إيونس
أنشد علي بنت الاصول كيف الكحيله المجنس

العفن راك اتماريه ورانك اديره قميرك
غير فوت عنه وخليه يوحل مع ناس غيرك

اللي حابك وايش بيدير واللي كارهك وايش داير
وبلا الله ما شي بيصير وبالله كل شي صاير

غير كنكن ياعيوني نوم الهنى ماعاد جاكن
فى القايله توجعني وفي الليل كاثر ابكاكن

عز الولد عقل و إزناد وعز البنات الرزينة
و عز الوطى سيل بداد إيخلف نوارير زينة

يا ولد سقاطة الريق اتجيبك للدار النقايص
ما يعجبنك تباريق دون ما توق التخايص

اللي كاسبك كاسب الخير عليه ما تميل أخدودي
ها يا رحاي يارحاي وين ما نلومك تجـودي

هذه رحاتنا ثقيلة ومانا علهيا قـوادر
تعالي يا وديـد يا أم السوالف حوادر

طحن الرحا شين مكروه لا نقبله ولا نريده
يخطر علي الغوالي اللي في البلاد البعيدة

نا يا رحا وين نطريك يخطر الغايب عليـنا
ينهال الدمع ويجـيك يبقي دقيقك عجينة

عيب الجمل قلت النقل و عيب الحصان الحراني
و عيب الولد قلت العقل إيظهر جوارح اللساني

لا تشد حتى أتلجم وتقنط أبدود الشريحه
ولا أتعل حتى أتوجم بالك الكلمة فضيحة

مرحول واربع مراحيل ومرحول هاذا امباته
ومرحولكم يا غوالي شغل خاطري قبل أماته

ما نرقد الليل كله ولا نضحك ولا أنجامل
من طول ياسكم يا غوالي الخاطر ذبل غير حامل

أجعل كل ممدود مردود وأجعل كل عوجه سقيمة
وأجعل مخطرك يا الغالي معول مع الريح ديمه

إللي باتها في المواعيد تنباع بسوم غالي
و اللي باتها في الملاحيد حالها كيف حالي

الصبر عند العرب مر وعند العوارف شجاعة
اشريه يا زايد العقل لوكان صاحبه باعه

اللي ما قرا ما عرف الفرض حتى إن تاب مازال جاهل
واللي ما مشى ما عرف الأرض وما يوردك عل المناهل

نا يا رحا جيت نشكي .. وننشّدك وين داره
غبى على العين اونساك .. والا زعم شن هي اخباره

وديانا اللي سماح ونجوعنا اللي احذاهن
هن عز للضيف والجار ويحمن الخايف ان جاهن

ماذمهم غير كذاب والله عدو كارهينه
هم كيف بوزيد وذياب سمح الثنا جايبنه

نوصي ياخاطر الليل ما تدوخ بين النزالي
وانشد علي نجع هلنا انعشوك والمير غالي

ناهلي زينين زينين فراسين ماهم معاره
ان كان حاربو مايذلو وان ميعدو هل ادباره

انتي هلك يا عين زينين وبيت الكرم بانينه
لاصنقرو في مواعيد ولا جارهم خاينينه

شراية اللي مرصع من السوق علين اسعاره
ومايضربو غير عالراس وكان ميعدو هل ادباره

ما ينزلو غير م العلو مطارحين النزالي
فرسان ركابة الفلو ايعزوك يوم القتالي

اني هلي ورادة البير اللي قبل ما جاه والي
وهل البيوت الدناقير هلي نباهم عوالي

نا العَيْن وانْتُو نظَرْها ونا لِيْد وانْتُو الصوابع.
ونا لَرْض وانْتُو مطَرْها بلاكَم اتْصِيْف المرابِعْ.

اِن كان رَبِّي عَطَاك يعِيْنَك عَلَى الدَّهر دِيْمة.
ترْمِي عَصَاتَك من اِيْدَك عَوْجا تبقي سقِيْمة.

الابِل طْوال العَرَاقِيْب وَيْن شَيّعَت ما تْواطي.
تطْوِي الوطَا طَيّ في طَيّ طَيّة طوِيل البْسَاطي

امْصَبِّي عَلَيْ واسِع الجال ويقُول زِيْدي بلُوله.
يَشْبَع اللي كان جَيْعان وان غاب جارْهم يرسلُوله.

اللي طلَب يطْلِب الله ويقُول يا كرِيْم المعاطي.
والعَبْد خَلِّيك منّه لا يرفعَك لا يواطي.

زِيْن النّخَل في العَرَاجِيْن وزِيْن المْرَا في السّوالِف.
وزِيْن الذّهَب في الموازِيْن اِن كان طاح في ايْدَيْن عارِف.

يا رَيتْنا ما ضنَيْنا وَقتاً نوَيْنا الفْراقي.
واللي ضنَىَ ما تهَنّا واللي ما ضنَىَ بات شاقي.

لَولاد ما يعملوا خَيْر ورَبَّيتّم نَيْن صارَوا.
وانْهَفِّت عَلَيْهم كما الطَّيْر ووَيْن نَبّتَوا الرِّيْش طارَوا.

ناري عَلَى اللي غَرِيْب في بلاد ما هي بلاده.
والفَم يَضْحَك ويَلْعَب والقَلْب صابِغ سوَاده.

ما يَوْجْعَك غَيْر من مات ودَانَوا عَلَيْه اللحايد.
كَلاّ غَرِيْب البلادات يعَاوِد بْطُول المدَايد.

يا طالْعاً فَوْق في الجَوّ ابْنِي عَلَىَ الصِّحّ ساسَك.
ويا حارِث الشَّوك مِن تَوّ اتْشُوف العَجَب في دْرَاسَك.

فاعل الخَيْر هَنِّيْه وبالفَرْح تَزْهَىَ ايّامه.
وفاعل الشَّرّ عَزِّيْه تبقي عَلَيْه النّدامة.

يا رَيتني طَيْر ونْطِيْر وجناحي عَلَيْ لَرْض هافي.
انْجي لغَوْشكَم يا غَوالي انْمَيْعِد ونَقلَع ارْيافي.

والشايلة شَمّلَوها ملَت ضَرْعها بالشّمَالي.
والحايلة سَفّرَوها جابَت لذِيْذ الوْكالي.

القَلْب صَنْدوق للدَّسّ وعِلّة البنادِم لسانه.
والوذْن تَسْمَع الحِسّ والعَيْن تنْظِر بيَانه.

يا سعَد مَن غايْبه جاه ويا فَرحته يا دلاله.
ونا غايْبي طال مَرْجاه مشْتاقَة لتَوقة خَيَاله.

وهذه امرأة عمياء تخاطب أطفالاً يلعبون إلى جانبها:
يا عوَينكَم يا اعْوَيلة اللي صايدِيْن العَوَافي.
اللي تنظروا في بعَضْكَم واللي ترقدوا الليل وافي.

شَيْناه يا قِلّة المال ودَيْن الرّجال الشّحايِحْ.
اِيْواطِي الباهي العَصْرَان وشَيْبه بلا كبْر لايِحْ.

يا رَبّ خَلِّصْ عَلَيْ خَيْر نَيْن نخلْصُوا مِن جبَاهم.
ناسَاً تحَاحِي عَلَى الطَّيْر مِن خَوف ياكِل عَشَاهم.
اَ
جْعَل كلّ مَمْدود مَرْدود واجْعَل كلّ عَوجَا سقِيْمة.
واَجْعَل اخْطُوْرهم أَوْلافي معَا هَبّ لَرْياح دِيْمة.

البَيْت لُولا استَارَه أيشيله نسُوم الهَبايب.
والنَّجْع لُولا اكْبَارَه ما ينْقدِع فِيْه عايب.

ما كَيْف خَيلهم خَيل دِيْمة عَلَفِّن بْزايد.
أَصايل اسْمَاح الصّهِيل ايْجَلَّن عَلَيك الغَدَايد.

حاذي المساعِيْد تَسْعَد حَتَّى بمَشْيَك معاهم.
وان كان حاذَيْت لَنْذال ايْغَبَىَ صوابَك احْذاهم.

ما يقْعدَن غَيْر لَصْيَات شَيْنات والاّ امْلاَحي.
لا سْبِد مِن قَولْهم مات أَمّا امْرَاض والاّ جْراحي.

نا اكْبرتْ واحْدَاب ظَهْري وعَيْني حَوَتّا ضبَابَة.
وازْعَمَا راه وَيْن قَبْري وفي وَيْن قِبلة ترابَه.

نا داي لُو صادَف اجْبَال اطْوَال عالْيات القنَايف.
يَبْقَن ضحاضِيْح ورْمال وهِن قَبل مَنْجىَ الخايف.

العَيْن للعَيْن مِيْزان والقَلْب للقَلْب راجِع.
بْنادِم ايْجِي بالاحْسان ويْبَاعْدَنّه امْواجِع.

و هذه المرأه تشتكي فراق الغاليه أمها وظلم الاقرباء
يا سعد من قال أمي ومن بيتها واجباته
تاريك يا ام جنه يا تعس من فارقاته

اخيه مامر ريقي واحيه ماحر دايا
واللي حسبته حبيبي ظهر عدو من ورايا

يا ميمتي يا وديده يا غاليا ما تهوني
جيتي عليا بعيده فيمن أنشيع عيوني

يا حاسه اللي انحسه يا ساهرة الليل دوني
يا ميمتي لو نشاكيك نخبرك ما طرالي

نسقط عيوني نبكيك وانسهرك ليالي
بيت الام مهدوم وجامع بلا بوها خالي

ياطير ياطاير لي السماء توطى نزيدك رويشه
وعلي قد ريشك احجابات ونجيك ياسيد عيشه

ياريت خوتي ثلاثين واولاد عمّي بزايد
ما ياكلوا لقمة الدين ولا يلبسوا جرد بايد

يا خوي كانك خيّ إنت الراي وانا الدباره
كانك خي كل النساوين حتى غلاي خساره

الحب مادارلي شيء والكره مادار حاجة
نقعد عليكم كما البي سلطان واخذ مجازة

تريت المحبة تشرهيب والمعرفة بالجلاوي
سية حبيبي كما جرح هلٌي ماله مداوي

لا قابلوا شبح لا نبح ولا من يدل الذهيبة
كان القطا داير الحس والريم داير جليبة

مايوجعك غير اللي مات وحازم عليه اللحايد
كلا بعيد الجوابات ايروح بطول المدايد

الثلب لو شاب وحداب وطال السفر بالمعاشي
بيعيه ياصاحب النــاب وخــودي بحقه حواشي

هني صحبتنا تحاكي ريافها على الغايب المنتظر فلذة كبدها
أنا القلب بايت يخمم والعين باتت سمورة’
على حيكم يا عزيزين يالندرة وين شورةْ

سريرن ذهب لريلي فيه وشمس الضحى فيه غابت
جا دونكم يا بعيدين وكبدي من الوحش طابت

يا عين خيرك ترفي انشاء الله خبر خير دايم
ومطول دموعكم تشفى جباهلك ما بي ايلايم

القيت دارهم بالحلاويق ومراحهم لوَّلاني
حدر دمع عيني دلافين لوما لزمته عماني

مثلتكن يا عيوني كيف الشنان البايد
رشاشيح ما وصلن وهلنا بعاد الردايد

ساهيتكن يا عيوني بيش تصبرن عن فراقه
كفوا الدمع وارحموني محال نبدو رفاقه

يا ريتني ما عرفته ولا شبّلي ليه خاطر
تباعد على شبحت العين وخلى دموعي قواطر

يا درانا وين جيتك عليّ خطر زول غالي
ويا ريتني ما لقيتك انحسه اريافي لجالي

اثبتن واشبحن زين طلحات والا بعاير
ولا كان ريتن الغالي يا ما لكَنْ من بشاير

صبرتهن ما نفع صبر كففتهن جنِّي ذوارف
عميّات بالدمع لنظار يبكن اللي موش عارف

لي عين بالدمع تنهال ولي قلب كاثر خيابا
على ونس غالي على البال واليوم دونا مجابا

الدهر يا مختبل فيه ياقل منه نجاتك
وحتي ان خطنك بداريه تواليه متقفياتك

الدهر بالك تلومه اشبح حالته في العرايب
وكم من صقر عاد بومه وقعد سابل الريش خايب

الدهر يامير غدار كيف بارمات المغازل
وعلي الاول يرقيك لشراف وتاليه يوطيك نازل

الدهر ياخايب الناس ماداسلك من حبايب
وبني ساس مبني بالقواس جهر جهر ماله سبايب

يا الله خير بختي مصرف السوق النكايد
حتي كان في الدهر مده مع الناس مالي سعايد
الصبر في هجاوة الرحا
ياخالق الصبر مر وياخالق الزرع صابه
كان ماسترت اول العمر كمل لنا في عقابه

الصبر عند العرب مر وعند العوارف شجاعه
واشريه يازايد العقل كان ريت مهبول باعه

الصبر حمله تقيل يقطع جديد العراوي
ماتقله غير بكره ولاجماله متقاوي

الصبر ودك تهييه قبل لاتجيك المصيبه
وان مات غالي ماتفاديه وطول الحزن مايجيبه

الصبر مفتاح الفرج والصمت قيد السلامه
والسو يمسي ويصباح علي فاعله بالندامه

الصبر مبني علي كيف الوطي والجبالي
كان الصبر فيه خير يالله تجعله راس مالي

اوقات في الصبر عله واوقات فيه الفايد
واوقات حملك أتشيله لوكان فيه الزوايد

اوقات نقلق ونزعل واوقات نرمي عباتي
واوقات نصبر ونرجي لين الصبر ياتي

الصبر هو طب الاوجاع والصمت يقهر الاعادي
واللي ترك باب الاطماع تحبه جميع لعبادي

رقة الغرض تجيب لفلاس واللي خاف جا لشنايع
راه الصبر والعزم والباس املاح مالهن شي ردايع

الصبر صابون لجواد والفقر ماو عار والي
وانشاء الله يادار هلنا مانقعدوا في خوالي

اللي صبر نال الارباح ونال مابغن قايداته
داوي صفافير لجراح وعاش طيبن في حياته

الصبر ديره عوينك ودير المليحه وداري
واللي مكتوب في جبينك ماعد يمحاه والي

غير قولها تاجد الصبر كيف ماوجدت العزايم
وكان ماغمنا قبر هلي فرق بينا يلايم

الاسعاد ماهن بالاجهاد ولاهن بكبر الجهامه
ولا الصايبه فرغت زاد ولا الصبر عقبه ندامه

ياخطري كون صبار علي الموجعه نقسموها
وهانا رحلنا من الدار وخلي العرب يسكنوها

الصبر نشريه بقعود ولد ناقتي من حلالي
يابال نلقاه موجود من عند مولي الموالي

اصبركان قابلك صبر واحسن لمن كان جارك
واطرح كفوفك علي الجمر لين حاجتك تنقضالك

صبار وماني عجولي نجيب المعاني قباله
ونفسي علي جالة الموت وياغايب الدا تعاله


الجار في هجاوة الرحا
والجار عيبه علي الجار يحاميه ويموت دونه
والقلب كماي لسرار واللي يخون الله يخونه

ودك اليا جاورك جار يجي زين وانته رديعه
وانت كما زيت غريان تشريه بالك تبيعه

ودك اليا جاورك جار يكون زين وانته رديعه
وماسمح الكحل في العين وماتسمعاش الوجيعه

ودك من العقل قنطار ومن الزين حتي وقيه
ودك اليا جاورك جار وراك مايعلو سيه

جيراني ياريتهم دوم وجيراني باعد جفاهم
وجيراني هاالمليحين قفز خاطري وين راهم

يا من اللي جواره لذيد كيف الام الحنونه
حتي ان تقاصن دياره في خاطري مانهونه

يامن الجار لحرف قله وباعد جواره
في البينه مادارلي خير وفي الباطنه تعقد ناره

جيرانا علم وهنا لاعيب لاحس راقي
ياريتهم وجعونا يوما نو عالفراقي

جيرانا هالمليحين روس العرب وين كانو
ياريتهم وجعونا بيش خلفو بيش هانو

سوال النبي يامعدي علي الجار وصا نبينا
ماحد قسمه علي حد غير ونسة الدار زينه

ودك اليا جاورك جار هو زين وانته رديعه
مابينكم غير لقدار والفم مايضهر وجيعه
هجاوي رحا في بعد الاهل
عيني عماها الرفيف وقلبي خداه الريافي
من وحشتك ياولد بوي مانرقد الليل وافي

بعيد نجعكم يالغالي بعد السماء عن الاراضي
وين تخطرو يابعيدين البلاد ايجدن امراضي

وين تخطرو ياغوالي يجي دمع عيني قواطر
بديت كيف من صايم الحول علي الثوم والبصل فاطر

بعيدين يالعين بالحيل عرب نشغلوهم ايجونا
وجا دونهم حول في حول ورقراق ياشين لونا

علي هلي ماني رخيصه امغير جو بعاد الجلاوي
والحي منهم ايجيني مع واسعات الفجاوي

شيعت عيني واطيت ماقابلو في ردايد
تحير دليلي ونطيت وجا دمع عيني بدايد

اللي بعدهم كيف الجدب واللي قربهم ريح جنه
منين فارقو هلك ياعين احنا ميسين المحنه

هجاوي تشاكي من الرحا
طحين الرحا ما نحبه اينوض عليا اكتوفي
تعاليلها ياوديده يلي عليا اتروفي

شينك رحا رحيها موت عرقها يسيل الوادي
علي شانها نحرم القوت ونغصب ضمايد فوادي

نوم الضحي هد صدري ونوم القوايل عماني
نوم العشاء مالقيته انا يا وحلتي في زماني

ياماشي قول لمي بنتك طريحة وساده
طحين الرحي هد صدري وكلام المواجع زياده

نا يا رحا كيفك انجض مقلول كيفك هنايا
متطاول معايا مرض داريرات بيا سوايا

هجاوي علي الاصحاب

ان حاذيت حاذي الزينين اللي يشبحو للبعيده
وان سميت سمي محمد وان ناديث نادي سعيده

ان حاذيت حاذي الزينين وراهم اتحصل عباتك
والعفنين كيف الطوابين ان قعمزت تحرق عباتك

اخيه ياتمر فزان فيك مرار بعد الحلاوه
واخيه من صاحبك ليك كان بعد المحبه عداوه

مسكين زارع الفول في باب المدينه
ومسكين من ياخذ القول في صاحبه ونور عينه

هجاوي رحا علي الاخ

خوي كذب من يذمه في الجيل ماله ردايع
ومحلا مشاكاة فمه يبري سلال الوجايع

واقف علي جلة البير ساقي حصانه بطاسه
هذا خينا يا ودوده مانحلفوا الا براسه

خوي ليا جا مروح قجوج الخلا رامياته
وقلبي تقي راح نوار وعيني زهت يوم راته

نا خوي ماهوش في الخوت ولايحمل ضيم فيا
فزاع في القوم جاسر وخلاص حق الوليه

ناخوي ماهوش مذموم وكل العرب عارفاته
يفزع اليا جاه مظلوم ويطرح للحق عباته

ياصاحب العلو عليه ويازايد العمر زيده
خي البناويت نجيه مصباح في دار سيده

الابل في هجاوة الرحا
انت حنينك يونس ياوارده عالمعاطن
واللي ياماماك عنده في الدار خلوه واطن

والشايله شملوها ملت ضرعها بالشمالي
والحايله سفروها جابت لذيد الوكالي

ماتربطوها علي الديس ماعندها فيه راده
تبي عشاب النواوير مرابيعها في الحماده

تحزم الغالي من الفجر ويهلهلها يوم ماها
وعد الغالي كما الصقر يرودلها في عفاها
..........
تمنيت نا خاتم بيده ولاكتب في زبونه
لو تضربوني بالاثنين غلا خاطري مانهونه

والله ماني بلا داء ولاني سليم الجواجي
الناس تمرض وتبرا ونا في رحمة الله انراجي

ما طول العمر ذلال ولاقصر العمر فارس
ولا صايبه قللت مال ولا كثر المال حارس

لافايده في مرق راس ولافايده في جغومه
لافايده في ولد ناس يجفاك وانته ترومه

مافيش في الناس متموم ولا في الشتاء ليل دافي
ولا في البحر بير معلوم ولا في العدو قلب صافي

عمر الندا ما ينبت بلا بارده والسحابه
وكلام العدو مايوسخ معاك يا منضف ثيابه

اوقات ياعقل دبار واوقات خوذ الدباره
واوقات تهرب من العار واوقات تنزل دياره

شاكيث حتي الرشادات التمن ودارن مناحه
اطريلي كما حادر البير قليل وين يلقي الراحه

يا عين خيرك ترفي انشاء الله خبر خير دايم
ومطول دموعكم تشفى جباهلك ما باايلايم

صبرتهن ما نفع صبر كففتهن جنِّي ذوارف
عميّات بالدمع لنظار يبكن اللي موش عارف

لي عين بالدمع تنهال ولي قلب كاثر أخيابا
على ونس غالي على البال واليوم دونا مجابا

اصبر أليا قابلك صبر وأجفل إليا جاك لافي
وخلي المذاري على التبن يأتن رياح العوافي

بكايا علـي بـوي وأمـي الاثنيـن راحـو رفاقـه
الأول مشي في أول الدهر والأخر مشي فى عقابـه

وهنا مجموعة أخري ولكن من الغناوي
الله يعِيْنهم لَوْلاف ...اخْطَروا عاونَوْني عَ الرّحَىَ

اخْذِي الليل بالساعات ...اسْمُوْر نَيْن يا لِيْد تَطْحَني

اطْرِي بعِيْد ياك ايْحِيْد ...النَّوْم يا رحَىَ دَوْرَد عَلَيْ

اللي اتْكِيْد في البَذّار... تكامَل عَلى ايْدي رَمُوْها

القَمْح والشّعِيْر اَرْدَاع ...تَلْقَيْه يا رحَىَ في شهادْتِك

تحْسَابَي الليل طوِيل... الفَجْر جاك بَوْقَة يا رحَىَ

لَيْش يا شعِيْر اتْدِيْر... سمار وانْت عابِي عَ الحَسَك

لِيْد ما اتْجِي للنار... محا ذنُوبْها ضَيْم الرّحَى

مازال الشّعِيْر شعِيْر... عَلَيْه لُو جَرَى سَيل الولي

نَقِّي وسَرّبي يا لِيْد... المَيْر لا يداعِيك عَ الغَثَر

اشْظَيْظ الرّحَى كّذّاب ...يْشاكِيْ بشِيْ مَو صايْده

لُو كان الشّعِيْر ايْدِيْر... قْصُور يا رحَى راك بانْية

اِن جاك الشّعِيْر اكْلِيْه ...حِنِّي عَلَيْه مَيْ ساعة عَدَد

ازْعَمَا يا كلَل لِيْدَيْن ... برَاد حَيل والاّ م الرّحَى

قلِيل يا شعِيْر نجاك... احْصلْت بَيْن لِيْدَيْن والرّحَى

الله يعطيك الصحه ومجهود رائع اختى بنت طرابلس

فرح كتب:الله يعطيك الصحه ومجهود رائع اختى بنت طرابلس

تسلمى يا فرح ربى يجعل اياامك كلها فرح

اجمعين وربنا يسمع دعائك