قلتو طاغي!!!!!!!!

قلتوا طاغي .. قلتوا ظالم قلتوا باغي .. دوة بانت جاغي ماغي .. بالك درتوا فاس وفله؟!.

قلتوا واطي .. قلتوا ياما دار تواطي .. حاكمنا بالفكر الخاطي .. فكرة من يقدر يوصله؟!!!.

ربي غافر .. قلتوا خاسر .. ما هو ظافر .. م اللي حط ايده في الكافر .. م اللي خاطى نهج المله؟!!!.

قلتوا هارب .. قلتوا خلاها ع الغارب .. قلتوا قول ظهر مضارب .. حاشى ماو رباية ذله؟!!!.

قلتوا خرّف .. قلتوا في القران ايحرّف .. تحسابوه الكذب ايشرّف .. ما عمره الكذاب تعلّى.

قلتوا عدّه .. قلتوا ضرّ الوطن وهدّه .. لين نطق بيكلمة جده .. لآخر كلمة ما انتخلّى.

قلتوا دمّر .. قلتوا هذا ماو معمّر .. قول قباله قول امشمّر .. زدتونا ع العلّه علّه.

قلتوا عاصي .. قلتوا للداني والقاصي .. قلتوا قول ظهر متقاصي .. والذاهب ما ذاهب ذلّه.

قلتوا طاحت .. دولة دكتاتور وراحت .. كانا حق الناس ارتاحت .. م اللي يشّاكوا من القلّه.

قلتوا جينا .. قلتوا خلّطنا العجينة .. كل واحد تلّف طاجينة .. خليتوها خبزة ملّه.

قلتوا حرّة .. قلتوا حلوة بانت مرّه .. قلتوا هاو بنينا جرّه .. ما عقبتوا منها بلّه.
يا فتفاته .. يا خنابة يا شحاته .. ما تسووا جدّاد عباته .. هاللي كان امغطي ظلّه.

قلتوا ثرنا .. قلتوا ع الظّلاّم ظهرنا .. قلتوا زال اليوم كدرنا .. لاونكم في النار من الله.

قلتوا برقه .. قلتوا غربه قلتوا شرقه .. قلتوا هانا فوق بخرقة .. من تبّعكم خلّى خلّى.

قلتوا قلتوا .. ما غيّرتوا لا هفّتّوا .. خيرلكم لو كان سكتّوا .. ناس القول بدوا في علّه.

قلتوا رمنا .. قلتوا هاو اليوم حكمنا .. قلتوا ما حد امكمّمنا .. ليه اتمجّوا من عبد الله.

قلتوا لالا .. قلتوا لا معمر لا عياله .. كان انتم ع الحق اقباله .. راهي رامتكم ورفلّه.

تحسابوها قش انخاله .. تمشي شلّه تغبر شلّه .. والخاطي م اللي ياباله .. والراقد هوه ولا هالله.

قولي واضح .. قولي كلّه .. ما نسّلّى .. عرق معمر واعر سلّه

حارقهم بشموخي