الجها سينتهى عندما يقدم كل شئ على حقيقته /رغم سراكة الخونة

سراكات ليبية

بريشة أدمـ3ـن للحوار السياسي الليبيى

السّراكة عند الليبيين هي العادة والطبيعة.. اليوم بالفقّوشي وبالفلاقي
بنتكلم عن سراكة جديدة من سلسلة تناولنا للسراكات الليبية عبر صفحة الحوار.

سراكة اليوم بنكهة سياسية.. هذا يا سيدي يا بن سيد عندنا مسؤولين وسياسيين
اصح من خلايقهم ماريت .. وعندهم سراكة تكسر الرقبة واتفيّض المرارة ويركبك
ستين عفريت.
انا نتكلم عن سراكة الكلام بعد فوات الاوان وبعد انتهاء
وقته .. انوضح اكثر.. السي اجليل طالع اليوم بعد ما كان متبكش وقال ان
الجماعة المتشدده هي اللي تغتال في الضباط ؟؟ صح احنا كلنا عارفين هالكلام
لكن يا سي المششتار خيرك ماقلت هالكلام ايام المزلس وليش توا تقول فيه بعد
ما انجرّت كرعيك في الفلقة يا اقنين.
وهالسراكة راهي مش عند اجليل بس
حتى دراه الكبد اللي اسماها الحمروش متعة الصحة .. هالحصلة هيّجت في
الوزارة وين تمت مدتها شيّطت لايرلندا وأول ماوصلت في بلادها الحقانية خطر
عليها تتكلم على الفساد في قطاع الصحة وكيف الثوار لهطوا مليار في تلخبيطات
علاج الجرحى.
ومش هكي بس ماهو حتى السي اجويلي بعد خراب مالطا ناض
وتمت وزارته خطر عليه ينوض الصبح بلا غسل وجه ويقول راهي درع ليبيا مش تبع
وزاره الدفاع ورئاسة الاركان دايرة مافي راصها وانا ماعنديش صلاحية.. وخيرك
يا سي الذكر ماقلت هالكلام في وقته.
وحتي الغزال الاخر بوشاقور ياعطه
شاقور (الشاقور معناه الفأس الصغير) اشويقير بعد جبدوا من تحته البساط وطلع
ايروري بلا حكومة ولزوه عصابة ركسوس .. حتى هو طلع يصرح وقال الاخوان
قلبوا عليا لان ماوافقتش نعطيهم 9 وزراء . وخيرك ماتقول هالكلام قبل
مايزرّوك من الركسوس.
الخلاصة كان ريتو حد ايدير في السراكة المالغة اكتحوا على زومته التراب وقوله توا نقطّنا بسكوتك على قولة السوريين