انغير اسمي يااعضاء ويامشرفين ؟؟ عشن كرهوني فيه

السلام عليكم ورحمه الله وبركاته



انا مره نزلت موضوع ليش اخترت اسم حرة بجانب بنغازيه وحكيت القصه قلت لان انا لانرضى بوجود الناتو لانرضى بوجود عدوان يهودي وكافر على ارضي انا حره لاني مع القائد حرة اعطانه حريتنا المراه خاصه مالذي كانت محرومه منه ؟ بجد انا منعرفش ايش الحريه اللي المرأه كانت محرومه منها ولقتها في نظرهم وانا حكيت بالتفصيل في موضوع سابق عن كلمه الحره ولااعني بها ابدا مايصفونه هم لاني بريئه من ماوصفوه بالحريه

لذلك قرنت اسمي بالحرة ورغم اني وجدت من احد الاخوه بارك الله فيه في رساله خاصه يذكرني بها من فترا يقول لي انت بنغازيه نعم ولكن لماذا حره لذلك كان موضوعي السابق

انا بنغازيه لاني فعلا من بنغازي وحرة لاني لا ارضى بوجود كافر على ارضنا ولاخائن



ولكن ماجعلني اكتب هذا الموضوع اني لاحظت كل مرا دخول هؤلاء من يدعون انهم احرا وبنات ويختارن في كلمه حرة مرا بنت بنغازي الحره اللي اغلب الاعضاء اكيد لخبطو بيني وبينها لانها تقريبا نفس الاسم واللي اخي المحتسب منزل موضوع يعتذر منها رغم ان كلامه لو دقق فيه غالطه واجد مش قصه انه يحسابها زعلانه من قصه جرذان او جماعه اسلاميه لا كلامها كان جارح وبعدين حتى قصه الديمقراطيه اللي حاكيه عليها ؟

ومرا وحده تخش علي انها شرقاويه حرة ونفس القصه وتوا بنت ليبيا الحرة مش عارفه شن قصه الحرة اللي كل واحد فاهمها بشكل هو من اي ناحيه الله اعلم

المهم انا معش عرفت كيف اندير لان منبيش حد يفهمها غلط مني اختيار كلمه حرة في حين انا نعتبر قديمه معاكم وبالعكس انا الحمد لله عمراش حد حسيت منه ان كلمه جرحتني بالعكس المنتدى هذا له اثر كبير في نفسي من لما عرفته وانا نفسيتي الحمدلله لاني لقيت ناس فيه عوضتني باللي خسرتهم بل بالعكس احسن اخرا وربي يعلم قد ايش لهم مكانه عندي لاني وجدتهم وقت محنه وقت انا نعاني من اللي نشوف فيه لكن الحمدلله وربي يحفظكم ويبارك فيكم



لهذا شن رايكم انا بصراحه نبي نعرف انحولها كلمه حرة ونخليها بنغازيه بس وطبعا نطلبها من المدير العام

لانك ولدتي حرة
ولانك لاترضي بان تحتل ارضك
ولانك لاترضي بقيود الخونة
ولانك ابنة بنغازي وبنغازي حرة ولاتقبل ان تكبل بقيود المعتوهين وقضبان الجرذان
من هنا جاء لقبك
فلا داعي لان تغيرية

ردي بالك أختي بنغازيه حره
ردي بالك تغيري اسمك
لأن الاسم واصفك وصف صحيح
تبي تتبري من مدينتك؟ و الا تتبري من حريتك؟؟ اذا فيه حد يغير اسمه، خلي هالاحرار المزيفين يغيرو أسماءهم إلى "الجرذه الخايبه" و الا "الغولة الهره" و الا "العبده المهانه" و الا ايا كان الاسم اللي يختاروه..ما دخلي فيهم

أختي بنغازيه حره، انتي شرف لاهلك و شرف لمدينتك و شرف لبلادك و شرف لينا اننا تعرفنا عليك، و عطيتينا أمل في بنغازي و خليتينا نتأكدو أن بنغازي فيها الاحرار الحقيقيين، فيها الشريفات العفيفات...ردي بالك تغيري اسمك..عن نفسي، تعودت عليه، و حتى لو ما سمعتيش الكلام و غيرتيه، حتقعدي ديما بنغازيه حره، و مش حنخاطبك إلا على أساس أنك بنغازيه حره

أنتي يا بنت بنغازي أفضل إنسانة رأيتها في الموقع

إياك أيتها الأخت العزيزة أن تقومي بتغييره فهو اصبح يجسد شخصيتك والتي تعودنا عليك بها وهو بمثابة تغيير علم البلد لذا لا تجعلي أحد يؤثر عليك ورجاء من إدارة المنتدى أن تنبه على أن لا يتم مضايقة الأخرين والإستهزاء بهم ويتعرض لعقاب صارم بإلغاء عضويته وتفضلوا جميعكم بتقبل التقدير والأحترام

يا بنغازية انا شهادتى فيك مجروحة وانتى تعرفي ليش ولكن اتمنى عدم تغيير الاسم وحتى لو حصل بعض الخلط بينك وبين اى عضو اخر ونحنا نريد بنغازية الحرة معانا بهدا الاسم وانا اسف كنت مشغول الايام الماضية ما تواصلت معاك بس الان الحمدلله انتهت الامتحانات واى شى تفضلى ننتظرك وننتظر المواضيع الهادفة

مرحبا اختي البنغازية الحرة ,انا اول مرة الاحظ وجدوك في هذا المنتدى لاني عضو جديد ,ونقولك بالبنغازي تي امغير كنك مكبرا الشطحه!(وعذرا على هذه المزحة لاني نبي نخليك تضحكي) عشتي

بارك الله فيك اخي ليبيان باتريوت وان شاء الله مش حنغيرة وبارك الله فيك اختي شيماء وبروكينبن لكلامك الرائع واخي فوزي اشكرك وشكرا اخي المحتسب والاخ زيكو بارك الله فيك لكلامك وكذلك اخي سياسي ومحارب الصحراء تشكروا واجد وبارك الله فيكم وطبعا شكر خاص جدا ليك ياعابر سبيل لانك اول من ساندني واعترف بان لك فضل علي لخروجي من محنتي وانا الان اشكرك رغم ان كلمه الشكر لاتكفيك لانك تستحق اكثر منها لك انت ولاختي عاشقه ليبيا وروح العروبه عارفه انك كنت مشغول في امتحاناتك وربي يوفقك ويحفطكم بس تستمر معانا لان الامتحانات خذن وقتك كله وبصراحه قلمك له بصمته فالمنتدى ان شالله بالتوفيق لك ولكل دارس ان شاء الله

أبووليد كتب:

خلوها خلوها ..
تغير اسمها كيف ماتبي, الرأي في الأول والأخير للمراقبين.

هي تغيره والمراقبين يردوها.

لالالالا خلاص ان شاء الله سأضل بنغازيه حره

اختى بنغازيه حره لقد تعود الجميع على اسمك المتميز فكيف يؤثر فيك شويه خائنات بائعات لوطنهن
فانت اقوى من ان تغيرى اسمك وعملتى زين العقل وكلك ثقه فى بنغازى والان بالذات انتى بس ادعى وربى يتقبل الدعاء وان شاء الله بالنصر يارب العالمين ... امين

إنما الاعمال بالنيات ولكل امرءٍ مانوى

فمادام نيتك صافية لا تكثرتي بما يقولون ويفعلون، اصابع اليد ليس مثل بعضها في الطول ولهذا فلا تتوقعي ان يفهم الجميع قصدك ولكن عندنا توضحي نيتك لهم العاقل يفهم والجاهل اتركيه فما يهمك جهله ولا علمه
والسلام عليكم

بنغازية حرة كتب:بارك الله فيك اخي ليبيان باتريوت وان شاء الله مش حنغيرة وبارك الله فيك اختي شيماء وبروكينبن لكلامك الرائع واخي فوزي اشكرك وشكرا اخي المحتسب والاخ زيكو بارك الله فيك لكلامك وكذلك اخي سياسي ومحارب الصحراء تشكروا واجد وبارك الله فيكم وطبعا شكر خاص جدا ليك ياعابر سبيل لانك اول من ساندني واعترف بان لك فضل علي لخروجي من محنتي وانا الان اشكرك رغم ان كلمه الشكر لاتكفيك لانك تستحق اكثر منها لك انت ولاختي عاشقه ليبيا وروح العروبه عارفه انك كنت مشغول في امتحاناتك وربي يوفقك ويحفطكم بس تستمر معانا لان الامتحانات خذن وقتك كله وبصراحه قلمك له بصمته فالمنتدى ان شالله بالتوفيق لك ولكل دارس ان شاء الله

لاداعى للشكر يابنغازية فهذا واجبنا وايعلم الله معزتك عندنا

بنغازية حرة لقب رهيب وشجاع ااستمري غلية