يومية اخرى من يوميات الحاجه امباركه /المؤتمر الشعبي الفيسبوكي

[right]يوميات الحاجة آمباركة .. اليوم الحاجة امباركة تنظف في مخزن البطاطا والعلفة لقت صناديق لوح خضر سيبت اللى في ايدها ومشت نادت الحاجة مسعودة وخشوا للمخزن لقوا صناديق معبيات ذخيرة وصواريخ ورمانات قالت امباركة غبارة سودة شن هذا الولد جمعة شكله وجماعته مدايرين المخزن للسلاح اللى يمشطوا فيه من مخازن جيش معمر ناضت مسعودة توا بالله هذا يا امباركة مش عابر الحدود اللى انشوفوا فيه في الاستعراضات متع عيد الفاتح شن يدير هنا راقد تحت البطاطا ردت امباركة بالله يا حاجة مسعودة البلاد كلها راقدة تحت البطاطا وجعك غير عابر الحدود توا شن بنديروا في هالمشكلة وكان يداهمونا توا يقولوا بيديروا انقلاب على النظام ردت مسعودة بالله كانك على هذه ريحي روحك وينه النظام اللى بنديروا عليه انقلاب وبعدين كل مليشيا عندها مخزن ومخزن مليشيا جمعة جائ في مخزن العلفة ماهو البلاد حاكمينها جرذان ردت امباركة اسمعي يا مسعودة احسن حاجة نمشى انا واياك لمتع اللجنة الامنية قالوا واخد تريلة بحذا الجامع راقد فيها خلي انقولوا له ردت مسعودة راهو متع اللجنة الامنية مصباح متع الطرطوري اللى كان يحرث في الحوازة هذا شن يعرف زمان ضارب لي زوز زيتونات وهو يميل في الحوازة ولزيته ردت امباركة باهي نمشوا لمكتب الجيش الوطنى اللى ماسكه ولد سالمة ردت مسعودة والله يا امباركة الله يهديك ولد سالمة مش كان يبيع في الدلاع وعنده الصرع وياما درنا بيه على المرابطية ردت امباركة باهي شن الحل يا مسعودة ردت مسعودة اعطي الخبز لخبازه توا انكلموا ولدي ناصر وهو ضابط في 32 ويعرف يتصرف وبعدين يا امباركة بالك نلقوه في النهار الاحرف على رؤوس الجرذان ردت المباركة باهي كلمي ناصر توا اتصل الحاجة مسعودة بناصر وقالت له يا نصورة عندنا زيتون في مخزن عمتك امباركة نبو نعطوه لجماعة المعصرة بالك يعصروه ونحصلوا منه زيت تعالي توا ارفعه زيتون متع زيت على كيف كيفك رد ناصر انا مشغول يا حاجة توا ردت عليه مسعودة ناصر تبينى نغضب عليك ردت ناصر يا رسول الله توا جأيك ، العشية رفع ناصر اللي هناك والحاجة مسعودة قالت للحاجة امباركة كان جمعة قال وين مشي السلاح قول له جت مليشيا واخدته خليه يشد الريح شنى هم المليشيات شوية ماهو زي النجم يقتلوا الزرع ومافيه منهم فايدة .

يا عليك حاجات والله

منور خوي عبد الحق

والله مش عاديات اليوميات يا خوي عبد الحق ..

لكن لو تجمعوهم مع بعض فى عنوان واحد أفضل قريتهم كلهم لكن سيكون قرآتهم

أسهل لو فى نفس الموضوع

ربي يحفظ الحويجات إبداااااااااااااااااااع

منور أخي وربي يبارك فيك وفي الحاجة امباركة وجماعتها موضوع ممتاز لو تكرمت بتجميعه حتى يتسنى لنا تجميعه وإنزاله في شهر رمضان في حكايات البسباسي