عامين و الثالث قريب إيجينا ** سألتك بحق الله خيرك وينــــا

عامين و الثالث قريب إيجينا،،سألتك بحق الله خيرك وينه.
وينه الخير،،و وينه كلام النصر و التكبير.
كل عام جاي توخري توخير،،شكله وقودك ڤاز مش بنزينه.
يا عاطشة يا طايحه في بير،،غارق عليك و ما لقيتي عينه.
تبكي دموعك نازلة تحدير،،عمك سواد مغطيه و حزينه.
داسك اللي واطي حمار حمير،،قطري علي غربي وبايع دينه.
تبعتي مكاذب نافخين الكير،،راحت البسمه و العلَم و الزينه.
جرت بيك موضه!! موضة التغيير،،سيبتي الشعيرو جاتك الفارينه.
حتي العيل فيك صار كبير،،وقت المرض زايد عليك غبينه.

مره اغتيال و مرات في تفجير،،ومره خبر موتك قريب إيجينا.
ومره شبابك شاربين سكير،،حتي البلي واصل ف بنغازينا.
يا ليبيا بالله شن بيصير،،بعد الربيع عكست عليك سنينه.
ومن لوله و ما زال من لاخير،،حبك سكن في القلب كيف المينه.
ليك التحيه حب و التقدير،،ايفرج عليك الله يا مسكينه.
يجيك الزهي بعد النكد و إيطير،،تنحل المشاكل ليك و تفكينا.
عامين و الثالث قريب إيجينا،،سألتك بحق الله خيرك وينه.
تحياتي : علي الكاسح