الاعلامى الصامد خليل السورى

إعلامي .. ومراسل قناة الجماهيرية والرأي .. خليل السوري ..
.
.
بالله توا خلوني .. نتكلم بالعقل .. خلال سنتين .. شن درنا ..
توا احني ليبيا سنتين وأكثر برا البلاد .. سوا كنا أعلاميين أو من الناس مهجرة برا ليبيا .. أوك ..
طول هالفترة .. معقولة .. لم يتم تأسيس جسم سياسي .. ولا حتى إعلامي .. وهما هادم اهم شي في أن البلاد ترجع هذا لو فيه نية تبوا ترجعوها أصلا .. الســـــــــــــــؤال .. ليطرح نفسه .. لماذا .. لا يوجد تنسيق .. !!
لأن الجسم السياسي يكون يتكلم بأسم 2 مليون ليبي مهجرين وبأسم الأسرى قدام العالم دوليا .. تي أحني توا الموجودين برا اكثر من عدد سكان قطر .. يعني قولوا .. دولتين .. زي قطر مهجرين .. " ولا يمثل طبعا "
ومافيش من يمثلنا ولا يتكلم بأسمنا .. والشي الثاني والمهم .. مافيش جسم أعلامي خاص بينا .. وهذا الجزء المهم إللي 70 في المية منه أنه يرجع لبلاد ويقنع دول العالم بالاعتراف بينا .. ونوضحولهم حقائق ولكن لحد الان مافيش ناطق رسمي أو حراك من قبل الاعلاميين في حتى القنوات العربية او الاوروبية .. يعني تجي تتفرج على قنوات تلقى رأي واحد بس الطرف الأخر لاهي .. في حاجات ثانية في بعض الدول . إيه ..
في ناس لاحول لها ولا قوة .. وفي ناس .. مهجرة مش لاقية شن تاكل .. وفي ناس ماشاء الله .. نص لبلاد خانبينها معاهم لهما القطط السمان .. حوايز وسيارات فارهة .. وكان تجي تكلمة يقولك والله ماطلعت بحاجة .. وطبعا ماننسوش الناس إللي قريب تملك البارات .. وهما كل يوم بايتين لا صبح فيهم .. وطبعا لا ننسو عشاق المولات السيتي ستار ومول العرب .. وغيرها .. إللي يكحلوا ويلخبطوا .. وين تجي تحكي معاهم .. يقولك اني من قبيلة فلان وقبيلتنا قدمت اكثر شهداء واحني قبيلتنا تريس .. واحني مش عارف شنوو .. واني كنت في الجبهة واني كنت في الخد واني كنت في العنفقة .. وماننسوش .. البالتوكيون .. الذين لا يأكلون ولا يشربون ولا ينامون .. وفي الغرف يتشدقون .. وفي الوطنية يرخصون .. ولمن يريدها يعطون .. فتبا لكم من تكونون بأسماء مستعارة تتكلمون.. فمنهم من يتكلم على وطن ومنهم للولاءات يعطون .. فسؤالي على ما انتم مقبلون ؟
ولا ننسى أنأس موجودين في الداخل .. ومتعشمين فينا .. انهم يشوفونا طالعين ونتكلموا بأسمهم في الوقت إللي مش عارفين كيف يتكلموا داخل وطن .. تمت سرقته ..
وهذا كلامي .. إللي عاجبة عاجبه ..وإللي مش عاجبه يخبط راسه في حيط .. واني ليبي وقبيلتي ورشفاني والعلم الاخضر يمثلني .. والشهيد معمر القذافي رمزي .. وسيف الإسلام أملي ..
الإعلامي خليل السوري ..