هلوسات ليبي .. متابعات

من طرف Zico الإثنين 27 أبريل - 22:42

هلوسات ليبي ..

الاتنين 2015.04.27

حتى نعطي كل ذي حق حقه وجب علينا ذكر فوائد فبراير ؟؟

فالبرغم من كرهنا لهذه الفوضى والغاغة إلا إن عندها مزايا لايستطيع أحد أن ينكرها !!

ـ أول حاجة عرفنا التريس وعرفنا العائلات الليبية الاصلية !!

ـ تاني شيء عرفنا تراكين ليبيا بالطرف !!

ـ تالت شيء عرفنا قديش كانوا فيه منافقين في العالم !!

ـ رابع شيء عرفنا جميع (الحيوانات القمامة) اللي جذبتها رائحة دماء الليبيين !!

ـ خامس شيء عرفنا معنى كلمة العرب جرب !!

ـ سادس شيء عرفنا معنى انك تكون راجل وتمزق كتابهم في دارهم !!

ـ سابع شيء عرفنا قديش كان القذافي داير غصة في حلق خنازير الجزيرة !!

ـ تامن شيء شفنا الاخبار لايف ع الطبيعة بعد كنا نشوفوا فيهن في النشرات !

ـ تاسع شيء عرفنا معنى إن يكون ما عندكش كبير !! يشد عليك كلاب السكك !!

ـ عاشر شيء عشنا الخوف والجوع والغربة بعد كنا نقروا فيهن في القصص !!

ـ حادش شيء قعدنا مضرب مثل في التشردم والتفرق وقعدوا البرانية يلايموا فينا لبعضنا !!

ـ طانش شيء فبراير بينت القلوب السودا و نؤضت نعرات وثاراث قبلية مدفونة من عشرات السنين !!

ـ تلاتطاش فقدنا البسمة والفرحة واللمة الحلوة وعرفنا قديش كنا متريحين !!

ـ اربعطاش قعدنا نتمنوا في الماضي بعدما عشمونا في المستقبل !!

ـ خمسطاش قعد أي واحد في الدول التانية يخوف في صاحبه ويقوله .. هاه رد بالك راك أدير حاجة تولي بلادنا زبالة زي ليبيا ... فكنا .. ريحنا !!

وزي ما قال أمرؤ القيس في قصيدته الشهيرة .. من بحر العتبي !!

أني مليوع ..مانحمل وجيعة ما نحمل وجيعة ..

نخش الغيب ... والله الوسيعة

اني مليوع..

وسامحوني (نهلوس) خوكم كلام عرب

هلوسات ليبي .. ///
الأربعاء 2015.04.29
أمتحان نهاية الضحكة !!!
الدولة العميقة والراديكالية والعلمانية و البراغماتية والبروسترايكا والبروليتاريا والبيروقراطية والتعددية والتكنوقراطية والدكتاتورية والفيدرالية والليبرالية ومبدأ ترومان ومبدأ نيكسون والحكومة المؤقتة وحكومة الأنقاذ الوطني وحكومة تسيير الاعمال ومجلس الانتقامي والمؤتمر الوطني العام والبرلمان الليبي و عملية الكرامة و عملية فجر ليبيا و الهيئة التأسيسية لصياغة الدستور ..
السؤال الآول ؟؟
أستخرج من المصطلحات السابقة ما يلي :-
1ـ مرتب شهر 3
2ـ عشر فرادي خبزة
3 ـ علاوة العائلة
4 - الشركة العامة للكهرباء
5 ـ المؤسسة الوطنية للسلع التمؤينية
6 ـ المؤسسة العامة للصحافة
7 - المؤسسة الوطنية للنفط
8 ـ مطار طرابلس الدولي
9ـ ميناء بنغازي
10 ـ جامعة قاريونس
11 ـ الأمن العام
12 ـ سوق الاوراق المالية
13 ـ مهرجان الشعر الشعبي
14ـ الدوري الليبي
15 ـ الهدوء وراحة البال
السؤال التاني
ـ كم تتوقع سكان ليبيا ؟؟
السؤال التالت
ـ إن كنت من متساكني ليبيا وعشت فبراير بكل تفاصيلها أكتب في بطن أيدك كيف تتوقع أن تكون نهايتك ؟؟
ملاحظة ... السؤال الآخير إجباري
وسامحوني نهلوس (خوكم ) كلام عرب

هلوسات ليبي .. متابعات

هلوسات ليبي .. متابعات

رد: هلوسات ليبي .. متابعات