ضيقة الخاطر والحيا المرماده ** تشيب صغير السن قبل انداده

قصيدة تحكي عن واقع الحال في زمن كثر حب الناس فيه للمظاهرالخارجيه وتناسو ان الداخل هو الاهم
هي قصيده طويله اخترت منها مجموعة ابيات علها تعجبكم

ضيقة الخاطر والحيا المرماده ** تشيب صغير السن قبل انداده

والحيا المندمه *** تشغشب على ابنادم تنزح دمه

القل يغبي زول كان مسمى *** والمال يشهر ناس ماهم ساده

بلا مال ما تقدر شروط الهمه *** وتجواد ما تظهر عليك جوداه

والحيا المدمومه *** تشغشب على ابنادم أطير نومه

بلا مال بو جلجل يولى بومه *** وبالمال بو حوام فات العادة

ناش الحبارى قبل طير الحومه *والصقر حاير فى المعاش اوكاده

والحيا المعطوبه ** تشغشب على ابنادم وتقطع صوبه

بلا مال تبدا حالته منكوبه ** وبالمال يبدا عزم فات انداده

بلا مال تبدا عيطه منبوبه ** وفيه السوايا كايده العداده

والحيا المغتصه ** تشغشب على ابنادم وتبرم نصه

اللى قوى ياخد خيار الحصه ** الا الضعيف من فقره عليه صماده

واللى معاه العرف ما يتوصى ** يدير كل شىء بالقدر ع المعتاده

والصغا والهده ** تشيب صغير السن قبل المده

واللى عطاه الله ظافر قده ** تعلى على الكرسى زها بقعاده

واللى عقب والفقر قاطع رده * يفوت الصوايب غصب ما هى راده

والصغا والغصره ** وتسمع كلام العيب فيه الجسره

بلا مال ما عندك حبيب ونصره ** يفرج عليك الكرب بعد كساده

ولا ياخدك طول النهار وقصره ** يضوى ظلام الليل بعد سواده

حالها متبيّن ** تخليك ديمه بين خوتك هين

فى الجمع لو يبقى حديثك لين ** تقول طيبه ترجع عليك مكاده

وليا لهموك الدين ما تدين ** واسبق على ربك وسيع ابداده

واسبق على ربك بحسب وطاعه ** رزقك على ربك بغير نزاعه

بالك اتبع يا فهيم دناعه ** لو كان ما تكسب ولا وداده

خليه صوتك يرتفع بشفاعه ** واتبع عباد الصلح والزهاده

اتبع عباد الصلح راك تسلم ** وتفكر رقاد القبر وقت يظّلم

واسكت على مولاك لا تتكلم ** ورب القضا يصعب عليك عناده

وواجب عليك الفرض فيه تسلم ** واصبر على العازات غصب وراده

الشاعر امحمد قنانة الزيدانى

صح لسان الشاعر الجزل امحمد على هذه القصيدة الوافية وقد قال الحق في هذا الزمان الاغبر

لاهنتي يابنت الرصيفة على انتقائك المميز بارك الله فيك

شكرا لمرورك اخي محمد بارك الله فيك

محمد القحص كتب:صح لسان الشاعر الجزل امحمد على هذه القصيدة الوافية وقد قال الحق في هذا الزمان الاغبر

لاهنتي يابنت الرصيفة على انتقائك المميز بارك الله فيك

تسلمى اختى

ليام كيف الريح في الدرجاحه ... مره شقا الخاطر ومره راحه ... يقدعن ويميلن ... ويديرن حوايج ما عليك ايخيلن ... ويحطن حواهن ع القوي ويشيلن ... ويخلن العالي في الوطى مطراحة ... أوقات نخدم بيدي ... وايام يبدوا كاثرين عبيدي ... وأوقات عشر اكباش يبداعيدي ... واوقات مانكسب ولا صياحة ... ليام كيف الريح في الدرجاحه ... مره حنضله ومره تجي تفاحه ... مره ديار ونس ومره غربه ... والاجواد منهل ما يتم نزاحه ... ينبوع جاي سيل بين التربه ... والاندال مامنهم قلوب شراحه ... المختار واصفهم متيل الزربه ... بينهم مسافه واجده ومساحه ... كيف من امباعد بين بون او زربه ... رزاله او قباحه او شوشده وفطاسه او زيد قلة مربي ... وقت الشده يبانو اللي فيهم قلوب موده ... يضهر اللي باعد ما عليه معده ناسي الله او شرعنا كافر به ... مدعا ضنا الاجواد ديما قدا والاندال ديما ناوين الخربه ... يضحك معاك ان كان منك عدا وين اتباعد يطعنك بالحربه ... والاجواد ديما يلبسو في العده دون الضعيف ايجو عقادي صربه ... الايام بالمسعودي لاهن من جهدي لا من مجهودي ... يركبن فوق الجواد يهودي و ينزلن الباشات من عاليه
منقول عن الشاعر خليفة الفرجاني

تحية لكم ولشاعر هذه الابيات الرائعة .............. والله اكبر فوق كيد المعتدى

unkown soldier كتب:ليام كيف الريح في الدرجاحه ... مره شقا الخاطر ومره راحه ... يقدعن ويميلن ... ويديرن حوايج ما عليك ايخيلن ... ويحطن حواهن ع القوي ويشيلن ... ويخلن العالي في الوطى مطراحة ... أوقات نخدم بيدي ... وايام يبدوا كاثرين عبيدي ... وأوقات عشر اكباش يبداعيدي ... واوقات مانكسب ولا صياحة ... ليام كيف الريح في الدرجاحه ... مره حنضله ومره تجي تفاحه ... مره ديار ونس ومره غربه ... والاجواد منهل ما يتم نزاحه ... ينبوع جاي سيل بين التربه ... والاندال مامنهم قلوب شراحه ... المختار واصفهم متيل الزربه ... بينهم مسافه واجده ومساحه ... كيف من امباعد بين بون او زربه ... رزاله او قباحه او شوشده وفطاسه او زيد قلة مربي ... وقت الشده يبانو اللي فيهم قلوب موده ... يضهر اللي باعد ما عليه معده ناسي الله او شرعنا كافر به ... مدعا ضنا الاجواد ديما قدا والاندال ديما ناوين الخربه ... يضحك معاك ان كان منك عدا وين اتباعد يطعنك بالحربه ... والاجواد ديما يلبسو في العده دون الضعيف ايجو عقادي صربه ... الايام بالمسعودي لاهن من جهدي لا من مجهودي ... يركبن فوق الجواد يهودي و ينزلن الباشات من عاليه
منقول عن الشاعر خليفة الفرجاني

الايام كيف الدرجاحه .. مره شقا ومره راحه ..
هابتين وهــابه .. يعطيك الصحه خوي ..