ثورة الفاتح ,,,,,, أغنية وطنية

https://www.youtube.com/watch?v=vf4x_JJ2VMU

بدّيت وبادي بالبادي
نبدأ باسم الله الهادي
بإسم الشعب و بإسم بلادي
بإسم أجدادي و بإسم أولادي
حطّامين أحلام العادي
ركّابين علم ونعّل
ركّابين على الحمّاقه
شرّابين حليب الناقه
غرّافين رقيّل ساقه
فزّاعه والخيل شراقه
يزّابو يا أسود رماقه
عـ الزمن لوّل لوّل

فزّاعه للوطن الغالي
غالي طالب دم غوالي
بعد التركي جاء ايطالي
حبر وماهو طيب والي
صبوا له يا عين الفالي
راحوا مقتول وقاتل
دون الوطن الغالي طاحوا
لين يغادر ما يرتاحوا
مردا عنّا ما ينزاحوا
واللي ما طاحوا ولا ذاحوا
خشوا غيم الله و راحوا
مطلوبين تقول خِوِل

مش بإرادة فاتوا هلهم
بالسيف الظالم صمّلهم
عن كل العالم عازلهم
خشة لفياف مرحلهم
واللي يسرهم عدلهم
بين ألغام وشوك ودل
قديش مواجع فنّاها
من طاري الأجواد محاها
لحقت ليها بأنساها
بعد العز هرب خلاّها
لكن راعيها مولاها
هاللي يمهل ما يهمل

لكن حامينها مولانا
قاري هالذنوب المليانه
من الطمّاعه ما خلانا
كيف ما جاهدنا كافانا
جاد و هب العون وجانا
برق الفاتح داب وشل
دارق يتشاكع في مزانا
مزنه في مزنه مليانه
سبحان الخالق مولانا
راجينا ما خاب رجانا
قادر منّانا وعطانا
بعد مرار الريق عسل

بعد مرار الريق تحلّى
وارتحنا والعالم الله
والشعب الليبي وصل له
عالي صوت الحق تعلّى
طل معمر سمح الطله
نادانا جينا بعجل
قائد نادانا وفزعنا
ديما عالخير مجمّعنا
والفاتح كملنا معنا
في القمة لفوق رفعنا
عالم خاطبناه سمعنا
قدمنا النظرية حل

قدمنا حل النظرية
تعلن تحرير البشرية
من الجور والعبودية
تبشر بالديموقراطية
عصر العزة والحرية
في العالم تهدي وتدل
نظرية للناس هداية
كانوا قبل النور عمايه
كانوا يم عيون سهايه
بالنظرية وصلوا الغاية
واللي كان يقول حكاية
جرب للمراد وصل

والمطلوب وصل مراده
من مسيود بدينا سادة
منتصرين بقوى الارادة
لمن شعبيات قيادة
للشعب الليبي الريادة
بالخير الله يكمل
نطلب من الله يأنينا
ويسلم كل غوالينا
و يعز العظمى لينا
والنهر الليبي يروينا
والوقت اللي بيه زهينا
ليه العادي ما يوصل