انسلم على لجواد اصحاب المروه نورت الميعاد ونقول مرحبا

انسلم على لجواد
اصحاب المروه نورت الميعاد
ونقول مرحبا
بلا تحكير


انسلم انمسي عالجواد ابخير
مالحدود من شرقه لراس اجدير
من عند الشواطي لحدود اتشاد
سلام عد مارفن اجنحت الطير
وعلى عد ماصب السحاب وجاد
سلام من صميم القلب مو تزوير
سلامي عللي سطرو لمجاد
فرسان ليبيا ركابة القنتير
اسماح الفزع وينما يصير اعناد
وتفنى الدنيا والكبير كبير
ولا يسير بيت بلا عمد ووتاد
سلامي عليكم ياسماح السيره
ياطيبين الخيم يالجواد
يأهل العقول الثامره الكبيره
ياقرعتي يانورة الميعاد
وقرعة اللي قاصر أخطاه قصيره
ويللي فالشدايد هل اعزوم أشداد
سوى في رفق والله سوى في جيره
ماكيفكم لاسع القيت اضداد
أنتو اعمار الوطن كيف الديره
اللي فالبداري برقها وقاد
اتخلي بطاحي لرض كي الحصيره
انواع عشبها تصعب على العداد
وانتو بيوتكم للقاصدين شهيره
بلا دليل يأتوهن ولا نشاد
والجود مو كثرة افلوس وليره
غريزه عطاها خالق العباد
اللي عندهم دون الكرامة غيره
ابدينهم وبيهم عازه لبلاد
عليهم العقل ايجود في تقزيره
الخيرين يطريهم بلا جباد
والجرح الكبير اللي قوي تسطيره
مع ذكرهم يبرا بلا ضماد
وعلى جارهم مايعرفو تكديره
ولا ايسكرو فالبير عالوراد
وانجاهم القاصد يعرفو تقديره
ولجواد ديمه للعرب مقصاد
فكاكت القضية الواعره العسيره
اللي غيرهم مالناس فيها كاد
ولا يفتنو لا يعرفو تكديره
نضيف دربهم مالغبن ولاحقاد
ماهم وذايل من أنفوس حقيره
خراب عامره فالوطن كي الجراد
ولجواد هلي يستاهلو الشكيره
وشور غيرهم لجواد ما ننقاد
وندعي الله في كل وان ضهيره
وين ما الشمس اتميل للمهواد
يالله ياعالم لاغاوي طيره
ياكريم ياحنان ياجواد
ان تحفض ضنا لجواد مالتكديره
اللي عالفقاره يقسمو فالزاد
ونختم كلامي بالصلاه عالخيره
اعداد ما خلق فوق الوطا رشاد
انسلم على لجواد أصحاب المروه نورت الميعاد ونقول مرحبا

هذه القصيدة علي ابناء الجماهيرية الحرة وتريس معمر القذافي انشالله ربي يجمعهم ي وم النصر

أللهم أمين