لو توجعك ما نمت منها الليل ... جديد على الكيلاني

كلمات جميلة ومؤثرة
مشكورة اختي الكريمة طبيبة القلوب الخضراء
وبارك الله فيكِ .

مانمت منها الليل تقول ع القياده لاهدات الخيل كان توجعك مانمت منها الليل
مانمت منها غافي لاضي والع لا الضي الطافي تقول في وسادي حاطين مشافي تجي قبالتي نقفز غطاي انشيل
خوي ياخدك بالحظن حظنه دافي وفي الظهر يطعنك طعنه بكل غليل
انت دايره متقاك ع النفنافي ومهاجاي اليا دارت الخيل صهيل
لو يبردنه حقوق خوده وافي حقك وخود فوقه حق عديل
انا عارفك زعلان لين مجافي وحني من وجعها كادنا التحميل
لكن قباله الش ماهو خافي هذي طامزه كبرى ونكبة جيل
على ماعليها نسترو بالضافي بدت واضحه بانت بلا تمقيل
على ماعليها نكتحو في السافي وهي مسمعره ترقى تزيد شعيل
يجوك وفد فوق الشوك يمشي حافي لو كان منك موجعه بتحيل
ولوكانهو مازال ماهو كافي ومافيش في قلبك اهناك سبيل
مكتفين ياقايد كتاف اخلافي هاك موس دبحنا بلا تقبيل
في وين مانتغطى وفي وين ماراسي ع الوساده نحطه تجي قبالتي فيسع انوض بنطه بعد صار هلي نقول مستحيل
كيف خوك يدخل للعدو في خطه وانت حاسبه ساعة الدم يسيل
اللي ضامنه فازع فليله غطا طلع بايعك في السوق بالتدليل
طلعت قباله الناس مش مجتطه خيانه تعرت ناكره الجميل
متحشمين ياقايد الراس توطى طايحين في طرفك علي ماقيل
موش بسيطه يخونك اللي بيه الحذر والحيطه اللي تحسبه سدك طلع ساليطه على ظهرها بتمر الاساطيل
هاللي جدوده يفزعو للعيطه لخوته دار الرصاص ثقيل
طلع راسمك لعداك بي الخريطه وموضحك بالشرح والتفصيل
مش توجعك من خوك طالع طيطه خاين وواضع في الخيانه ديل
اللي خان خاين روحه الرحله طويله وشاقه ومفتوحه وبالجاي مرحبه واللي مشي مربوحه وغربال ماله في الدبش تمييل
طامعين شافوها الا ممسوحه خشولها عمم عليهم سيل
في من غرق واللي طلع في لوحه مشي في العلف خلف البحور ظليل
دوم للنوايب خيمتك مطروحه ومقصرين في حقك وكنت اصيل
رميناه حتى بحيط فوق سفوحه طاح الرطب منه تقول نخيل
انديرو الرزيله العاريه المفضوحه وهو في عباته يضمها ويشيل
مالناش اعذار جايينك هكي جهار نهار وغالطين حد الغلط عاللي صار وعارفينها ماتنغسل بالنيل
وعارفينها سوده وصغا ومرار وعارفينها كبرت على التكييل
وقديش مره صاير التكرار ومن غيرنا ماسرتها بالحيل
درنا اللي في الغير ماتندار يابال من حطك عليه وكيل
وحتى اللي هابو بدو جسار وتمت روايقهم علينا تسيل
كلاب ظاله واذناب الاستعمار اللي قبل مايبانوش في الدرميل
هذي هي فرصتهم لرد التار وحني بيدينا والعين فتيل
حني نازلين من حدره على جافار انظني كوابحنا بلا تعديل
حني دوم في حقك وباستمرار ومهما علينا تحط راه قليل
هاذي جرودنا واكبر عليها النار بلاك انت ماعادش علينا تخيل
https://www.zangetna.com/t39799-topic

شكرا لك أخي محمد الجهمانى ..

وشكر كبيييييييير لخوي ناصر على وضع الكلمات نصاً ..
جميلة جدا هذه الكلمات

خوي ياخدك بالحظن حظنه دافي وفي الظهر يطعنك طعنه بكل غليل
انت دايره متقاك ع النفنافي ومهاجاي اليا دارت الخيل صهيل
لو يبردنه حقوق خوده وافي حقك وخود فوقه حق عديل
انا عارفك زعلان لين مجافي وحني من وجعها كادنا التحميل
لكن قباله الش ماهو خافي هذي طامزه كبرى ونكبة جيل
على ماعليها نسترو بالضافي بدت واضحه بانت بلا تمقيل
على ماعليها نكتحو في السافي وهي مسمعره ترقى تزيد شعيل
يجوك وفد فوق الشوك يمشي حافي لو كان منك موجعه بتحيل
ولوكانهو مازال ماهو كافي ومافيش في قلبك اهناك سبيل
مكتفين ياقايد كتاف اخلافي هاك موس دبحنا بلا تقبيل


صدقت فى هالكلمات ... الله لا تسامح الخونة