معمر القذافي بيدير مجد لروحه بس

طبعا لما تحكي على موقف مشرف ولا حادثة عظيمة تشهد لشجاعة وتحدي ونبل معمر القذافي . يطلعولك فاقدين الحجة والمنطق والمفلسين تاريخيا وثقافيا ونضاليا ويقولولك هذا بيدير مجد لروحه بس .
باهي ياكرك أنت وياه . جيب ودنك معاي وخلي نشدوها وحدة وحدة . توة لما كان طالب وقرايته وحياته في خطر وينظم في المظاهرات ضد الإنفصال ويكتب في المناشير كان يراجي فيك أنت وياه باش تقول دار معمر وفعل معمر .
ولما كان ينتقل من سرت لسبها لمصراتة لبنغازي وهو تحت المراقبة ويقنع في الناس بضرورة الثورة ضد الفساد والتخلف والفقر والجهل والتبعية . كان يراجي فيك أنت ولا أنتي باش تكتبوا التاريخ وتشكروه .
ولما جمع الضباط الأحرار والرفاق والجنود البواسل وقام بالثورة وطرد خمس قواعد أجنبية وأعلن من ميدان الجلاء في طرابلس بأن ما لم يتحقق الجلاء فإن القتال سيكون من شارع إلى شارع ومن بيت إلى بيت . كان يراجي فيك أنت ياتافه ولا أنتى يامريضة تقولوا معمر بطل وثائر .
ولما كان يقول طز في أمريكا وطلع في زورق حربي يرسم في خط الموت والأسطول السادس في البحر المتوسط كان عالق طوارئ وممكن يقصف في أي وقت وممكن الراجل يطير راسه فيها . ومائة وسبعين طائرة يقصفوا في بيته . كان يامعتوهين أنت وياها يبحث عن مجد لنفسه ولا تاريخ لليبيا وللأمة العربية والإسلامية .
ولما كان فاتح الخيمة في باب العزيزية وفي العتعت لكل حركات التحرر ويدعم في المقاومة الفلسطينية شنو كان يراجي في حمير حماس يكتبوا اسمه علي القدس . ولما كان يدعم في المؤتمر الوطني في جنوب أفريقيا شنو كان يراجي في هذا الزوما يكتب عليه شعر . ولما كان يعمل على فتح ملف مقتل ياسر عرفات وشنق صدام حسين شنو كان يراجي في التافه بشارة ولا عباس ولا علاوي يبعثوله رسالة شكر . ولما كان يتكلم على قضية الأكراد شنو كان يراجي في البرازني ولا الطالباني يديروله تمثال ويسموا شارع باسمه .
ولما دار الإتحاد الإفريقي العظيم كان يراجي فيك أنت وياها تصفقوله وتعلقوا صورته .
ولما دار النهر الصناعي لإحياء مدن الشمال وإنقاذها من العطش شنو كان يراجي فيك أنت يا متخلف تقول شكرا يامعمر . ولما قطع العلاقات مع مصر السادات بعد إتفاقية كامب ديفيد شنو كان يراجي فيك يامطلين تقوله صحة ليك .
ولما أجبر إيطاليا على الإعتذار وتقبيل أيادى أبناء المجاهدين شنو كان يراجي فيك أنت يامسطول ولا أنتي يامفلوتة تقولوله رفعت راسنا وخديث بثأرنا .
ولما جمع ودس 400 مليار للأجيال القادمة شنو كان يراجي فيك أنت ياجاهل ولا أنتي ياحاقدة تقوليله بارك الله فيك بحكمتك تجاوزنا الأزمة العالمية وأمنت حياة اولادنا وأحفادنا .
ياتافهين كان يبيك أنت وياها ترفعوا روسكم قدام العالم . ولما يكلمك أمريكي ولا بريطاني تحط صوابعك في عيونه وتقوله احنا الليبيين طردنا قواعدكم غصبا عنكم . ولما يكلمك عالم أو خبير في البيئة تقوله أحنا الليبيين درنا الأعجوبة الثامنة النهر الصتاعي واحنا محاصرين من كل العالم . ولما يزايد عليك حد الماني ولا تركي ولا أيراني تقوله احنا اللي قلنا طز في أمريكا وأسطولها في المتوسط . ولما تقعمز في مقهي فيها حمار قطري وينشدك تكلمه براس خشمك وتقوله احنا اللي طردنا هويلس اكبر قاعدة امريكية خارج اراضيها مش خايفين من طيارتين وعشرين جندي في السيلية . ولما تمشي تصلي في اي جامع في العالم وتلقي علامة او فقيه ويقولك منين تقوله بثقة احنا بلد المليون حافظ لكتاب الله . ولما تدهور في أي بلد أفريقي ويلاقيك حد ثوري أو مناضل تقوله أحنا اللي حررنا أفريقيا ووحدناها . ولما تتلاقي مع إيطالي فاشي تشبحله من فوق لتحت وتقوله أحنا اللي كسرنا خشم روما وركعناها وأجبرناها على الإعتذار . ولما تتمشى في شوارع أوروبا بالفرملة والجرد وحد ينشدك من وين اطيح الكبوس على جنب وتقوله أحنا اللي مزقنا ميثاق الأمم المتحدة في قلب أمريكا ولوحناه على وجوههم . ولما تتلاقي مع قروب سياحي فرنساوي ويقولك من وين تحط رجل على رجل وتقوله احنا اللي ردينا القاضي الفرنسي ببارجته من البحر المتوسط وأجبرناه يجينا في طائرة مدنية وراسه في الأرض . وأنتي ياحنة لما تلاقي وحدة من السعودية والامارات وتنشدك من وين ياحرمة تشوفيلها على جنب وتقوليلها منين انتم تناقشوا في المرأة تسوق السيارة والا لا أحنا كان عندنا سرب كامل من الضابطات الطيارات المقاتلات ولما كنتم تناقشوا هل صوت المرأة عورة والا لا كانت احدي طياراتنا تكسر الحصار الجائر وتحط في القاهرة في رحلة التحدي غصبا عن أنف أمريكا .
القائد كان يبني في مجد ويسطر في تاريخ لليبيا وللأمة العربية والإسلامية . زي ماقال هذاكا الشايب ( معمر عقب تاريخ . عقب تاريخ . معمر وعمر المختار وعبد الناصر هذول عقبوا تاريخ"حتى لو موتوا ماموتوا يقعدو ديما لجيل الجيل لجيل الجيل يقعدو ) ... الفـــــــــــــارس

معمر القذافي بيدير مجد لروحه بس 10710669_1000331089982101_17514974017569433_n

معمر القذافي بيدير مجد لروحه بس 10710669_1000331089982101_17514974017569433_n

أروع مقال أجمل أسلوب أتمنى أن يبقى على الأقل أسبوع كاملا منشورا في المنتدى ليقرأ من تعرض للتغليط
أنشروه على نطاق واسع أتمنى من كل ليبي أن يقرأه
رحم الله الشهيد امعمر

معمر القذافي بيدير مجد لروحه بس

معمر القذافي بيدير مجد لروحه بس

رد: معمر القذافي بيدير مجد لروحه بس