العنوان خرافه لاكنها هادفه /حوار من صحيفة ليبيا المستقبل

مر صبية فلاحين بشايب هرم أبيض الشعر تملأ تجاعيد الزمن وجهه
ويديه جالس تحت شجرة زيتون وامامه برلد من الشاي المربرب يغلي فوق نار
هادية فوقف الصبية أمامه وسألوه:-

الصبية - يا شايب ما رايك في الربيع العربي؟
الشايب:- يقولو الربيع من فم الباب يبان، وباب حوشنا يفتح على
الجبانة وما شفوش غير الجنائز كل يوم ولما سألنا من هم الموتى قالوا لنا
هؤلاء الشهداء وجرحى الثوار أرسلوهم إلى أوربا للعلاج فقال لهم الأطباء
إنهم مرضى بالسرطان فرجعوا إلى ليبيا في صناديق.

الصبية – يتكلمون في طرابلس عن مجلس إنتقالي يحكم ليبيا من عين هذا المجلس؟
الشايب – قالوا شيخ عين أصحابه وأصحابه عينوا أصحابهم وعملوا مجلس.

الصبية - ومن عين هذا الشيخ؟
الشايب – قالوا دكتور عايش بره في باريس.

الصبية - وشنو يدير هذا الدكتور؟
الشايب – هذا الدكتور كلب ضال كما يقول القذافي عايش بره في باريس
وعنده أصحاب يعرفوا بركة حسين أبو عمامة متاع الأمريكان وسارجوزي متاع
الفرنسيس وكمرون متاع الانجليز قالوله أصحابه إذا كان هويعرف حد في ليبيا
يقوله يدير مجلس بيش الناتو متاع النصارى يقدر يساعد الثوار الليبيين ضد
القذافي. فأتصل الدكتور بالتلفون بالشيخ ألذي كان مع القذافي من الكبار
ولما الثوار قاموا عليه هرب إلى الجبل، وكان مستريح في بيته يطيب في الشاهي
مع جماعة اصحابه يراجوا في المترودة وطلب منه الدكتور دير مجلس وسميه مجلس
إنتقالي بيش الناتو متع النصارى يساعد الثوار الليبيين، فقال له الشيخ
باهي وين بلاقي الناس اللي بديروا المجلس، قالوا له الدكتور خليك أنت ريس
وأختار إصحابك وأصحابك يختاروا أصحابهم وانا بنبلغ الناتو. بش عيني رايس
حكومة وبشرط أقعد بره في باريس حتى تحز الحكاية هكي ولا هكي.

الصبية – وكيف قبلوهم الناس؟
الشايب – لما سمع الناس بالخبر قالوا أيوه هذه الحكومة الجديدة
اللي ندوروا عليها وتفكروا شنه كانوا يديروا في عهد القذافي كل واحد بعث
تلغراف يهني مجلس الانتقامي ويبايع بيش يحصل حصة في الحكومة الجديدة.

الصبية- قالوا سمعنا الشيخ دار خطبة كبيرة يوم إعلان تحرير ليبيا شنقال؟
الشايب - الله يطول عمره فال كل واحد توه يقدر يتزوج أربع نسوان وبيحكم بشرع الله.

الصبية – وشن حكاية ها الشباب المتسلح قالبين طرابلس هات يارصاص وكل واحد يطخ في الأخر.
الشايب – ما تخافوش هديم شباب ثوار يحفظوا في الأمن ويتبعوا في
كلا ب القذافي، وقالوا ما نرموش سلاحنا حتي يدير المجلس الأنتقالي
الديمقراطية هذي اللي قال عليها القذافي ديمومة الكراسي.

الصبية – شو بيصير توه
الشايب - ما تخافوش الشيخ قال يابختكم يا ليبيين يا ما جايكم من خير

الصبية – وشنو دوة زيارات الشيخ للبلاد العربية؟
الشايب– ما تخافوش الشيخ طلب من الشباب السوداني والمغربي والشباب
التونسي واللبناني والمصري والتركي والاردني وغيرهم يجو يعمروا ليبيا
لأولادها بيش يصبح كل ليبي متريح في بيت كبير ويسوق سيارة مرشيدش وبعالج
بلاش هو وأولاده في مستشفيات فيها اطباء نصارى وأولاده يقروا في مدارس
كويسة بالانجليزي. وكل عام يسافروا بره شهر في لندن وباريس وجرمانيا وبلاد
الطليان للتداهوير كيف أهل الخليج والخير الجاي.

الصبية – وشنو حكاية زيارات البشير متع السودان والطنطاوي متع مصر ورايس تونس ووفود الدول الأخرى عرب وعلوج وسود.
الشايب - هديم جايين يهنوالشعب الليبي بالثورة ويساهموا في تعمير
ليبيا بيش يحصلوا على نصيبهم من فلوس البترول ألي بطرق في ليبيا. القذافي
كان قافل عليهم الشيشما وما يعطيهمش إلا شوية فلوس بقشيش بعد ما يقبلو يديه
ويبسو رجليه ويخلوه ينصب خيمته ويخطب ويشرح كتابه لعلمائهم وصحفييهم الي
فيه الحلول لكل مشاكل بنادم وحوة ويديرولا إستقبال شعبي ويهتفون له وينادوه
بأمير المؤمنين وعميد الحكام العرب ورئيس الأتحاد الأفريقي وملك ملوك
افريفيا. حتى بركة حسين أبو عمامة متع الامريكان وبليرمتع الأنجليز
وبرلسكوني متع الطليان وساركوزي متع الفرنسيس يسبحوا بحمده وبرلسكوني متع
البشكه يبوس في أيديه على التلفزيون شفته بعيني هذي.

الصبية- ولد عم القذافي القط الكبير ما زال في مصرليه ما يطلبوه الليبيون
الشايب – ولد القذافي هذا رجل فالح وخادم على راسه عامل حوائز
مزارع هائلة وكل واحد يتكلم عليه يعطيه حوازة فيسكت يقولك مزرعة في اليد
ولا وزارة في مهب الريح.

الصبية – ليش ما يقطعوا العلاقات مع مصر حتى يسلموا كلاب القذافي؟
الشايب - ياصغيورتي انتم ما زلتو صغييرين كل كبار ليبيا من راس جدير
إلى السلوم شارين حوائز وبنايات ووتيلات وشركات في كل بلاد مصر. لو
الليبيين حمروا عيونهم في مصر تضيع فلوسهم.

الصبية – وعيلة القذافي في الجزائر والنيجر ليش ما يطالبوا بيهم ويجيبوهم مكلبشين؟
الشايب – هابه علي، الشيخ قال الجزائرين قالوا ضيفنا عيلة القذافي
لاسباب إنسانية و هو قال على عيون أمهم خليهم غادي ومجلس الانتقامي عنده مشاكل
مع قبيلة وما يبيش مشكلة ثانية مع قبيلة اخرى.

الصبية – تونس جي رابسها إلى ليبيا وأحتفلوا بيه ليه ما يسلموا المحمودي
الشايب – قالوا بلسلموه لما ليبيا يكون فيها قضاء عادل زي ما عندهم في تونس وهم عارفين إن هذا مستحيل فليبيا بلد ثوار وسلاح وقبايل.

بشير إبراهيم

من طرف ???? الخميس 19 يناير - 13:06

لعنة الله عليهم وعلى مجالسهم وعلى اصحابهم من الكفرة الفجرة

العنوان خرافه لاكنها هادفه /حوار من صحيفة ليبيا المستقبل

العنوان خرافه لاكنها هادفه /حوار من صحيفة ليبيا المستقبل

رد: العنوان خرافه لاكنها هادفه /حوار من صحيفة ليبيا المستقبل