مالهم كيف يحكمون

منشور حول إتفاق الصخيرات ( أقول للثوار .. انتبهو يا أحرار فمن باع الوطن يجهز الآن لدخول طرابلس على مدرعات الإمارات كما دخل المالكي للعراق على مدرعات أمريكية ) .
باهي يا شاطرة مدامه الدخول على الدبابة الأمريكية عار أمالا فبراير اللي أنت تمثليها شن وضعها من الإعراب ولا مصدقة جبناها بالتكبير وحررناها بجيلاتينة وصدور عارية ( طبعا مانقصد العري اللي عالسكايبي وسيقان العبيدي وملابس زيدان ومقاطع الوزراء المخطوفين وموضوع مديرك اللي مايدس على هيثم في شي ) . نقصدوا عري الثورة والثوار الحقيقيين .
ومدامه المالكي والجلبي عارفتيهم خونة وتضربي في الأمثال بيهم أمالا أنتم كيف طلعتوا ثوار وأحرار مع أنكم جميعا جابكم الكاوبوي الأمريكي على ظهره .
المالكي لولا بوش مايحلم يحكم بغداد ولا حتى يقرب حدود العراق هذا صحيح لكن لولا فزعة ساركوزي شن بيوصلك تفترشي في الريكسوس بإسم الليبيين . وبعدين مدامه المدرعة والطيارة الإماراتية خيانة أمالا منو جابها قبل أربع سنين ورقصلها وهي تدك في الليبيين وتمزط فيهم بالقنابل الذكية والغبية .
وأنت تقرأ لجماعة فبراير يجيك إحساس إنهم هما اللي قالوا طز في أمريكا وهما اللي رسموا خط الموت وهما اللي ركعوا إيطاليا وهما اللي قاتلوا الناتو ومرات يسرح خيالك معاهم تحسهم هما فتحوا الأندلس . وإن إحنا اللي بكينا للجزيرة وغنينا لساركوزي ودرنا الوجبات للمارينز .
لكن الحق مش فيك . الحق في المساطيل اللي يهزوا في روسهم ومرشحينك وزيرة شئون إجتماعية تقرري نيابة عنهم ويتراقصوا على الشرعية اللي تمثليها ويموتوا في الجبهات دفاعا على السلاطة اللي تمرسي فيها عالفيسبوك والتويتر .
طبعا جماعة الشرعية الأخرى ( اللي هناكاي ) ماتضحكوا راهو عاركم زيهم وأحرف . عاد تمثلكم سرقيوة ومدللة وعريبي وكويدير . ( وما أحرف من الثومة كان الكرات ) . بالله عندكم وجوه تقابلوا وتحكوا بيها وتطلعوا في القنوات وقدام العالم ومعتبرينها شرعية وأمباركة .
الفارس الليبي

حمزة بوفارس على قناة النبأ؛
حرام ان يكون كافر مع جماعة الحل والعقد كما حدث في الصخيرات ..
وهي باطلة كذلك لغياب شيوخ العلم والشريعة عنها ..
وحكومة السراج باطلة و محرمة شرعا ...
مش عارف الناتو منين كانت فيته عام 2011
عدو الإستسلام